Հայաստանի գինեգործների միության նախագահ, «Մարան» ընկերության հիմնադիր տնօրեն Ավագ Հարությունյանը Aravot.am-ի հետ զրույցում մտահոգություն հայտնեց, թե զարգացումները տանում են նրան, որ վրացական գինին շուտով ռուսական շուկա կմտնի, ու մեր գործերը կվատանան. «Մեր գործերը կվատանան նաեւ այն առումով, որ Ադրբեջանն է ակտիվ՝ ռուսական շուկայում: Այժմ Ադրբեջանում լուրջ ներդրումներ են արվում, որակական փոփոխություններ: Ինչ վերաբերում է ռուսական էմբարգոյին, այն խիստ դրական ազդեց Վրաստանի գինեգործության վրա: Թվում էր՝ իրենք կկործանվեն, սակայն կործանվեց միայն այն մասը, որը նախատեսված էր զուտ ռուսական շուկայի համար եւ կեղծվում էր: Վրացիներն իրենց հայացքը ուղղեցին դեպի Եվրոպա եւ փորձեցին տեղավորվել եվրոպական արժեհամակարգում ու ստանդարտների մեջ: Դա բերեց նրան, որ Վրաստանում գինու որակը խիստ բարձրացավ, վրացիները «բյուրեղացան»՝ ստեղծելով կուռ եւ ամուր ինդուստրիա»:
Aravot.am-ը հետաքրքրվեց՝ արդյոք Ադրբեջանն էլ էր ներկայացված նոյեմբերի 20-22-ը Մոսկվայում կայացած գինիների միջազգային մրցույթին, որը կազմակերպել էր Գինու միջազգային կազմակերպությունը (Փարիզ): Հիշեցնենք, որ մրցույթին 100-ավոր գինիներից «Մարան Բագրատունի 2010թ.»-ն էր արժանացել ոսկե մեդալի՝ ներկայացուցչական ժյուրիի որոշմամբ:
«Ադրբեջանական գինին այն որակը չունի, որ մեզ մրցակից լինի, բայց ռուսական շուկայում էական է ոչ թե որակը, այլ գինին ներկայացնելը, իսկ Ադրբեջանը փող չի խնայում իմիջ ձեւավորելու, հարեւաններին վիրավորելու կամ գինու եւ խաղողի պատմությունը խեղաթյուրելու համար: 100-ավոր սորտեր ունենք, որ վերագրվել են իրենց; Ադրբեջանի գինեգործության պատմությունը Հայաստանի գինեգործության պատմությունն է: Ընդհուպ մինչեւ 1988թ, Ադրբեջանի բոլոր գինեգործական, խաղողագործական տնտեսությունները հայկական ծագում ունեին, իսկ խաղողի գինեբեր սորտերը զուտ հայկական էին կամ հայ գյուղացու ստեղծած սելեկցիոն սորտերը»:
Կարդացեք նաև
Դառնալով հեղինակավոր ցուցահանդեսին Հայաստանի հաղթանակին, պարոն Հարությունյանը հավելեց, որ «Մարան Բագրատունի-2010»-ը գրավել է ժյուրիին ոչ միայն որակով, այլեւ համուհոտով. «Մենք դա ստացել էինք հայկական «Խաթունխարջիի» եւ ֆրանսիական «Ալիգոտեի» խառնումից: Ժյուրին ճանաչել էր ֆրանսիական տեսակը, ու զարմացել, որ Հայաստանում «Ալիգոտեն» ձեռք է բերում ուրիշ որակներ: Եվ եթե ֆրանսիական կամ գերմանական ալիգոտեների մեջ գերիշխում են դաշտային, ալպիական ծաղիկները, ապա մեր «Ալիգոտեի» մեջ դարձյալ ակտիվ են ծաղիկները, բայց դրան գումարվում է մեղրի, հասած սեխի եւ անանասի հոտը»:
Վրաստանը, լինելով Խաղողի եւ գինու միջազգային կազմակերպության անդամ, մրցույթին չի մասնակցել՝ հավանաբար Ռուսաստան նմուշներ ուղարկելու խնդիր ունենալով:
Ավագ Հարությունյանը փաստում է. «Հայաստանը տրադիցիոն կարմիր գինու հայրենիք է, մենք միշտ կաղացել ենք սպիտակ գինով, որովհետեւ մեր սպիտակ խաղողի 99 տոկոսը գնացել է կոնյակի արտադրություն, հումքային բազան եւ տեխնոլոգիաները երբեք թույլ չեն տվել՝ նորմալ սպիտակ գինի ստանանք: Մեկ էլ հանկարծ Հայաստանը մրցույթում ներկայացնում է սպիտակ գինի ու այն շահում է Ոսկե մեդալ: Ես հպարտ եմ Հայաստանի համար»:
Գոհար ՀԱԿՈԲՅԱՆ
