Այսօր ՀԱԿ խմբակցության ղեկավար Լեւոն Զուրաբյանը լրագրողների հետ ճեպազրույցում հարցին, թե ե՞րբ եք նախաձեռնելու արտահերթ նիստի հետ կապված ստորագրահավաքը՝ Սահմանադրական դատարան դիմելու համար, պատասխանեց. «Երբ որ նախաձեռնենք: Պետք է շատ հստակ հարցը ձեւակերպենք: Դրա վրա մենք աշխատում ենք, կոնսուլտացիաների մեջ ենք մեր խորհրդարանական գործընկերների հետ: Երբ որ այդ հարցերում հստակություն մտցվի, մենք անմիջապես կկազմակերպենք»:
Հարցին՝ հապաղելը արդյոք պայմանավորվա՞ծ է նրանով, որ արտահերթ նիստին ներկա քաղաքական ուժերը ստորագրահավաքին կողմ չեն՝ նա պատասխանեց. «Ի՞նչն է հետաձգվել: Դուք համարում եք, որ 1-2 օրը ինչ-որ բան որոշո՞ւմ է: Ո՞ւր է, հապաղում չկա դեռ»:
Լեւոն Զուրաբյանը տեղեկացրեց, որ Սահմանադրական դատարան դիմելու հարցը մյուս խմբակցությունների հետ քննարկվել է, եւ կոնսուլտացիաները շարունակվում են՝ պե՞տք է դիմել ՍԴ, եթե դիմել, ապա ի՞նչ հարցադրումով:
Կարդացեք նաև
Դիտարկմանը, որ ՀՅԴ-ն նշեց, թե չի միանալու նախաձեռնությանը, քանի որ իրավական հարցեր կան, մյուս խմբակցություններից պատասխան ստացե՞լ եք՝ նա պատասխանեց. «Նախ մենք ՀՅԴ-ի հետ կոնսուլտացիաները չենք ավարտել: Մեզ չեն ասել, որ որեւէ դեպքում, որեւէ իրավական ձեւակերպման դեպքում նրանք չեն միանա մեր նախաձեռնությանը, գոնե մեզ նման բան չի ասվել: Կոնսուլտացիաները շարունակվում են»:
Հռիփսիմե ՋԵԲԵՋՅԱՆ
