«ԵԱՀԿ Մինսկի խմբի համանախագահների այցելությունը տարածաշրջան՝ ցույց տվեց, որ Լեռնային Ղարաբաղի բանակցությունը մտել է փակուղի»,- այս մասին այսօր «Փաստարկ» ակումբում հայտարարեց ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանը, հավելելով, որ ամեն դեպքում՝ համանախագահողները փորձում են անպայման մեկնարկ տալ բանակցություններին՝ պատերազմի հնարավոր հավանականությունը նվազեցնելու համար:
Ըստ Մանոյանի՝ խնդիրն այն է, որ համանախագահողները փորձում են հավասարության նշան դնել մեր եւ Ադրբեջանի միջեւ, համարելով, որ բանակցային գործընթացը փակուղի մտցնելու հարցում կա երկուստեք մեղավորություն:
Մանոյանը համոզված է՝ մեզ եւ Արցախին մնում է ակտիվացնել ճիգերը, որպեսզի Արցախի ճանաչումն իրականություն դառնա: Ի վերջո՝ «Ադրբեջանը պետք է հասկանա, որ չի կարող բանակցությունները պատանդ պահել»:
Կարդացեք նաև
Մանոյանն անդրադառնալով «Ժառանգության» առաջնորդ Րաֆֆի Հովհաննիսյանի Բաքու կատարած այցին, շատ բան չասաց, սակայն կարծում է. «Ասել թե` Բաքվում կայանալիք բոլոր համաժողովներին պետք է մասնակցել, ճիշտ չի լինի: Վերջին դեպքն էլ փաստեց այն, որ պետք է նախ հաշվի առնել, թե ինչ համաժողով է դա: Ճիշտ է ՝ Ադրբեջանն էլ խայտառակ եղավ, բայց չարժեր մասնակցել համաժողովին»:
Խոսելով սիրիահայերի մասին, ՀՅԴ բյուրոյի Հայ դատի եւ քաղաքական հարցերի գրասենյակի ներկայացուցիչը նշեց, հայ համայնքը շարունակում է մնալ Սիրիայում, թեեւ վիճակը ծանր է, բայց, բարեբախտաբար, ամենավատագույնը չէ. «Հայ համայնքը թիրախ չի դարձել տեղի ունեցած իրադարձությունների: Ու քանի որ վերջինը մնալու է Սիրիայում, հետեւաբար պետք է աջակցել գոնե այն մարդկանց, ովքեր գալիս են Հայաստան: Պետությունն ամեն ինչ արել է Հայաստան եկած սիրահայերի համար, սակայն կան բաներ, որոնց մասին չպետք է բարձրաձայնել»:
Եվա ՀԱԿՈԲՅԱՆ
