Այսօր «Հայելի» ակումբում ռեժիսոր Արմեն Գասպարյանը խոսեց «Հայկական հաց» ֆիլմի շուրջ հայ եկեղեցու դրած արգելքից: Ռեժիսորն ասաց, որ ֆիլմի պրեմիերան տեղի է ունեցել տարեսկզբին եւ մասնակցել «Ոսկե ծիրան» միջազգային կինոփառատոնին: Հիշեցնենք, որ «Հայկական հացը» գերմանառուսական համատեղ արտադրության լիամետրաժ-վավերագրական ֆիլմ է, որում հայկական տուֆը «ուղեւորվում» է Մոսկվա` հայկական եկեղեցի «դառնալու» համար:
Արմեն Գասպարյանը նշեց, որ ֆիլմի օպերատորը` Գագիկ Հարությունյանը, Մոսկվայի «Ռադոնեժ» փառատոնում ճանաչվել է լավագույն օպերատոր. «Ֆիլմը «Հայկական հաց» է կոչվում, սակայն ոչ մի տեսարանում հաց չկա: Հացը դա այն քարն է, որը, այսպես ասած, հավատի է վերածվում: Նկարահանումները տեւել են երկու տարի, քանի որ անընդհատ խոչընդոտներ էին առաջանում: Աշխատանքները չորս անգամ դադարեցվել են, քանի որ ռուսական թեմի առաջնորդ, արքեպիսկոպոս Էզրասը, չգիտես ինչու, որոշեց, որ ես իրավունք չունեմ նկարահանել, բայց, միեւնույն է, ես ավարտեցի ֆիլմը»:
Ռեժիսորը պատմեց, որ հայ-ռուսական սահմանին նկարահանումներ կատարելու համար թույլտվություն էր ստացել ՀՀ ազգային անվտանգության ծառայությունից, բայց Մոսկվայից զանգ ստացավ, թե իր նկարահանումներն ապօրինի են եւ արգելվում են. «Հավանաբար, եկեղեցին մտածեց, թե ես անկախ լրագրող եմ եւ ուզում եմ եկեղեցու գործունեության մեջ ինչ- որ բաներ բացահայտել: Սանկտ Պետերբուրգի սուրբ Կատարինե եկեղեցու հոգեւոր հովիվ Սարգիս քահանա Չոփուրյանը արգելեց ֆիլմի մասնակցությունը Պետերբուրգում կայանալիք փառատոնին, քանի որ, ըստ նրա, ֆիլմը չի կարող ներկայացնել Հայ առաքելական եկեղեցուն: Մայր Աթոռից ինձ պատասխանեցին, որ նա չի կարող արգելել, քանի որ եկեղեցու անունից պաշտոնական հայտարարություն կարող է անել միայն կաթողիկոսը: Արգելքի պատճառները հասկանալու համար նամակ ուղղեցի Մայր Աթոռ, բայց դիվանատնից պատասխան ստացա, որ եկեղեցին չի կարող պատասխանել իմ հարցին, քանի որ չունի պատասխան»:
Ռեժիսորը հավելեց, որ Իտալիայում նոր ֆիլմ նկարահանելու առաջարկ է ստացել, որի սյուժեն կապ ունի եկեղեցու հետ. «Մտավախություն ունեմ, որ կրկին եկեղեցին կխոչընդոտի: Խնդիրն այն է, որ ալգելքը պատճառաբանված չէ: Եթե ֆիլմը վատն է, ինչու է ամբողջ աշխարհը ցուցադրում եւ մրցանակներ տալիս»:
Կարդացեք նաև
Լուիզա ՍՈՒՔԻԱՍՅԱՆ
[…] մտքերն ու քննադատությունները համացանցում՝ https://www.aravot.am/2012/11/28/312481/ , https://www.aravot.am/2012/11/29/312606/ , https://www.aravot.am/2012/11/29/312619/ , […]