Այսօր ԱԺ պետա-իրավական հարցերի մշտական հանձնաժողովում Մարտի 1-ի դեպքի բացահայտման նոր ժամանակավոր հանձաժողով ստեղծելու նախաձեռնության քննարկման ժամանակ ՀԱԿ պատգամավոր Լեւոն Զուրաբյանը ելույթ ունեցավ. «Մարտի 1-ի զոհերի ծնողներն այստեղ են: Ոչ միայն իրենց զավակներն են զոհ, մենք բոլորս այս հանցագործության զոհն ենք, բոլորս: Մենք բոլորով պետությունից հիմա ուզում ենք պատասխան ստանալ, թե ով է պատասխանատու այդ պետական հանցագործության համար: 5 տարի է՝ ոչ մի պատասխան չունենք: Միջազգային հանրությունը դրել է խնդիր: ԵԽԽՎ բանաձեւն ասում է՝պետական մարմինները պետք է բացահայտեն պատասխանատվության շղթան: Իրականացվում է Մարտի 1-ի հանցագործություների պարտակման եւ կոծկման ծրագիր: Եթե այդպես չէ, եթե այստեղ կան մարդիկ, որ այս գնահատականին համաձայն չեն, ապա լավագույն ձեւն այն է, որ ստեղծենք նման հանձնաժողով, որոնք կամ կհաստատեն կամ կհերքեն դա: Մենք մեր ֆրակցիայի անունից մինչեւ ուրբաթ օրը կներկայացնենք նամակ ԱԺ նախագահին՝ այս օրինագիծը արտահերթ նախագիծ համարելու պահանջով: Ճիշտ է, այս նստաշրջանում արդեն դա հնարավոր չի լինի իրականացնել, բայց առաջին իսկ հնարավորության դեպքում դա լինելու է մեր խմբակցության կողմից առաջարկված արտահերթ նախագիծ: Մենք պետք է կարողանանք վերականգնել ժողովրդի եւ հասարակության վստահությունը պետական ինստիտուտների նկատմամբ, որը խարխլված է հենց Մարտի 1-ի դեպքերից: Լավագույն քայլը, որ մենք կարող ենք անել, դա այն է, որ ստեղծենք այս հանձնաժողովը»:
Լեւոն Զուրաբյանը նաեւ նշեց, որ մեծամասնությունը դրանով ցույց կտա, որ պատրաստ է ինչ-որ քայլ անել:
«Ժառանգության» պատգամավոր Զարուհի Փոստանջյանն էլ նշեց՝ «Միանշանակ է, որ դատական իշխանությունն այս գործերով իր առաքելությունը չի կարողանում անել: Սա այս պահին մնում է միակ միջոցը,որ հնարավորություն կընձեռի բացահայտել»:
Կարդացեք նաև
Հռիփսիմե ՋԵԲԵՋՅԱՆ
