Ոստիկաններն այսուհետ փողոցներում հետևելու են ՀԱԿ երիտասարդներին, ովքեր այս օրերին «Մի ենթարկվիր Սերժ Սարգսյանին» գրառումներով նկարներ են անում Կենտրոնի պատերին, նրանց վարչական պատասխանատվության ենթարկելու համար: Այս մասին «Առաջին լրատվական»-ի հետ զրույցում ասաց Երևանի ոստիկանապետ Ներսես Նազարյանը: Նշենք, որ նույն ոստիկանությունը հետևողականորեն չի նկատում, օրինակ, «Մեկ ազգ»-ի պաստառները, որոնք տարիներով կախված են Երևանի պատերին, և որոնցում ՀԱԿ-ի ու Լևոն Տեր-Պետրոսյանի դեմ գրառումներ ու կոչեր կան:
Ի դեպ, Կենտրոնի ոստիկանապետի և նրա տեղակալների պաշտոնանկությունը կապվում է հենց «Մի ենթարկվիր Սերժ Սարգսյանին» գրառումներով նկարների ակցիայի հետ: «Հայաստանն առանց քաղբանտարկյալների» նախաձեռնությունը երեկ հայտարարել է, որ նախօրեին իրականացված գիշերային «Մի ենթարկվիր Սերժ Սարգսյանին» ակցիան ազդարարում է բողոքի հրապարակային միջոցառումների նոր շարք՝ «խստորեն դատապարտելով իշխանությունների ու նրանց կամակատարների գործողությունները», և կոչ է անում Հայաստանի ապագայով մտահոգ բոլոր քաղաքական, քաղաքացիական միավորներին, քաղաքացիներին միանալ առաջիկայում կայանալիք ակցիաներին: Երևանի ոստիկանապետ Ներսես Նազարյանը հայտարարեց, թե Կենտրոնի ոստիկանապետի պաշտոնանկությունը կապ չունի ակցիայի հետ: Այս և այլ հարցերի շուրջ էլ երեկ «Առաջին լրատվական»-ը զրուցեց նրա հետ:
– Պարոն Նազարյան, կխնդրեի ասեք, թե ի՞նչ պատճառով է աշխատանքից հեռացվել Կենտրոնի ոստիկանության նախկին պետ Սարգիս Մարտիրոսյանը: Քանի որ հերքում եք, թե ակցիայի պատճառով է եղել պաշտոնանկությունը, հանրության համար անհայտ է պատճառը:
– Պարտադիր չի բոլորն իմանան՝ ինչ պատճառով է: Ներքին հարցեր է, որը որ ոստիկանապետն է որոշում՝ ով որտեղ պետք է աշխատի և ինչքան: Պարտադիր չի, որ հանրությանը պետք է պարզ լինի, թե ինչի է նախարարը փոփոխություններ անում:
Կարդացեք նաև
– Այսինքն՝ գաղտնի՞ք է, թե ինչու է պաշտոնանկ արվել ոստիկանապետը:
– Չէ, գաղտնիք չկա էդտեղ: Դա մաքուր աշխատանքային ա: Էսօր ազատվել է, մի շաբաթից նշանակվելու է այլ տեղ:
– Իսկ որտե՞ղ է նշանակվելու Կենտրոնի նախկին ոստիկանապետը:
– Որտեղ որ նախարարը հարմար կգտնի: Բայց կնշանակվի անպայման, որովհետև որևէ պրոբլեմ իր հետ, իր աշխատանքի հետ չկա: Ուղղակի որոշվել է, որ էսօր Կենտրոնի պետը պետք է փոխվի:
– Այս պաշտոնանկության շուրջ գաղտնիության պահպանումը չե՞ք կարծում, որ հանգեցնում է նրան, որ ավելի հավաստի է թվում մամուլում տարածված տեսակետը, որ դա հենց ակցիայի արդյունքում է եղել:
– Ինչ ուզում են, թող մտածեն: Պարտադիր չի, որ մեր մոտ տեղաշարժերը կամ աշխատանքային բնույթի փոփոխություններում ինչ-որ մարդկանց կարծիքը պետք է հաշվի առնենք: Սա զինվորական ծառայություն է, չի կարելի մտածել, որ արվում է հանրության համար: Սա միայն որոշում է ոստիկանապետը՝ ով որտեղ պետք է աշխատի, դա պարտադիր չի, որ հանրության համար պետք է պարզ լինի, կամ իրենք մասնակից լինեն այդ փոփոխություններին:
– Ասել է թե` Դուք պատասխանատու չե՞ք զգում հանրության առաջ՝ տեղեկացնելու նման հարցերի և ինչ-ինչ խնդիրների մասին:
– Նման տեղափոխությունները ոստիկանությունում ոչ մի կապ չունեն հանրային կարծիքի հետ: Ուզում եք կապել ինչ-որ դեպքի հետ, չկա նման բան: Տվյալ դեպքի հետ ոչ մի կապ չունի:
– Պարոն Նազարյան, ճի՞շտ է, որ Կենտրոնի նորանշանակ ոստիկանապետ Սերոբ Հարությունյանը ՊՊԾ ղեկավար Հրաչյա Հարությունյանի հովանավորյալն է:
– Նման բան լինել չի կարող: Հրաչյա Հարությունյանը ոչ մի հովանավորյալ չունի:
– Ի՞նչ գիտեք:
– Եթե իրար հետ աշխատել են, չի նշանակում, որ հովանավորյալն է: Հիմա եթե իմ աշխատողը գնա մի տեղ, պիտի ասեն, իմ հովանավորյա՞լն է:
– Պարոն Նազարյան, հիմա Կենտրոնի պատերին արված նկարների հարցն ինչպե՞ս է լուծվելու, ոստիկանները քերելո՞ւ են այդ նկարները:
– Ո՛չ: Կատարողներին բռնելու ենք և վարչական տույժի ենք ենթարկելու, ամբողջ քաղաքում նման բան իրավունք չունեն անեն: Վարչական պատասխանատվության են ենթարկվելու և պատժվելու են միանշանակ:
– Իսկ որքա՞ն տույժ է նախատեսվում դրա համար:
– Կոնկրետ հիմա չեմ կարող ասել: Նրանք կենթարկվեն վարչական տույժի շենքերի և շինությունների նկատմամբ նման գործողություններ կատարելու համար, որը նորմալ չի: Ընդհանրապես, որպես քաղաքացի որ նայեք` չի կարելի շենքերի վրա, սյուների վրա նման բան անել, նոր օրենք կա, որ նույնիսկ ռեկլամ թույլ չեն տալիս կպցնել շենքերի վրա:
– Պարոն Նազարյան, «Մեկ ազգ»-ը ողջ Երևանը վերջին տարիներին հեղեղել է Լևոն Տեր-Պետրոսյանի դեմ լոզունգներով, ինչո՞ւ Դուք դա չեք նկատում:
– Ես շտապում եմ, էլ չեմ կարող պատասխանել:
