«Չարենցը վիթխարի անհատ է: Այսօր Չարենցյան հերթական օրն է, նա ամեն օր է մեզ հետ»,-այսօր Եղիշե Չարենցի տուն-թանգարանում Չարենցի մահվան 75-ամյակի կապակցությամբ տեղի ունեցած ցուցահանդեսի ժամանակ նշեց Գրողների միության նախագահ Լեւոն Անանյանը:
Նրա համոզմամբ՝ հայկական պանթեոնը լեփ-լեցուն է հանճարներով. «Մեծ գործ է արվում, մեր բոլոր մեծերը ունեն նման օջախները, աշխարհի որ ծայրում էլ որ լինենք, հիշենք, որ հայրենիք ունենք»:
Կանադահայ քանդակագործ, բժիշկ Մկրտիչ Տարաքչյանը թանգարանին նվիրել է Եղիշե Չարենցի դասական ոճով արված, բրոնզյա քանդակը: Քանդակագործը, բացի Չարենցի արձանից, քանդակել է նաեւ Կոմիտասի, Վիլյամ Սարոյանի, Արշիլ Գորկու եւ այլ մեծերի արձանները.
«Չարենց քանդակելիս ցանկանում էի ցույց տալ եւ հայտնաբերել նրա ներքին ապրումները, հոգեբանությունը: Միայն դեմքի նմանությունը բավական չէ»:
Քանդակագործը կարծում է, որ Չարենցը զոհ գնաց իր գաղափարին, վճռականությանը եւ ազգային արժեքները բարձր պահելուն:
Եղիշե Չարենցի տուն-թանգարանի տնօրեն Լիլիթ Հակոբյանի պնդմամբ՝ նոյեմբերի 27-ը նշվում է ոչ թե որպես Չարենցի մահվան, այլ որպես հիշատակի օր.
«Թանգարանի բոլոր աշխատակիցների անունից ես շնորհակալ եմ նման նվերի համար: Պրն Տարաքչյանը հիանալի քանդակագործ է, ունի հրաշալի մանրաքանդակներ, դիմաքանդակներ, որոնց թվին կդասվի նաեւ Չարենցի քանդակը»:
Չարենցի թոռնուհի Գոհար Չարենցի խոսքով՝ չարենցյան առեղծվածը երբեք էլ չի բացահայտվի: Նրա կյանքն ու մահը ողբերգական էին: Չարենցը Ստալինյան ռեժիմի զոհ էր, ինչպես իր գրչակից ընկերներից շատերը.
«Չարենցը նվիրված հայր եւ ամուսին էր: Իրեն շատ էր անհանգստացնում ընտանիքի ճակատագիրը: Իր վերջին նամակում նա ասում է, որ միայն ընտանիքի հոգսն է իրեն հոգեպես տանջում, ճնշում եւ հոշոտում»:
Անժելա ՇԱՀՈՒՄՅԱՆ
