Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում դատավոր Գ. Կարախանյանի նախագահությամբ լսվեց «Միլանո» -ի հայցադիմումի գործով հերթական նախնական դատական նիստը ընդդեմ Հայաստանի Հանրապետության:
Դատարանը բավարարեց հայցվոր եւ պատասխանող կողմերի միջնորդությունները՝ դատական գործում ընդգրկել վարչական գործի եւ կադաստրից արխիվային նյութեր: Դատական նիստը հետաձգվեց, իսկ հաջորդ նիստը, ըստ դատավորի, կնշանակվի, երբ դատարանը ձեռք բերի կողմերի նշած փաստաթղթերը:
Հիշեցնենք, որ կառավարության որոշմամբ, Աբովյան 4 հասցեում գտնվող «Օլիմպ» ընկերությանը պատկանող նախկին «Միլանո» խանութը
պետական կարիքների համար վերցվել է ընկերությունից ու, ըստ ընկերության ներկայացուցչի , պատշաճ փոխհատուցում չի տրվել: «Փոխհատուցում տրվեց միայն առաջին հարկի համար, այնինչ շինությունը բաղկացած էր երեք հարկերից նաեւ 190 ք/մ հողատարածք ուներ: Ոչ հողատարածքի, ոչ 2-րդ, 3-րդ հարկի, ոչ էլ նկուղային հարկի համար փոխհատուցում չեն տվել: Այն պարագայում, որ սեփականության իրավունքի վկայականում նշված էր, որ երկու հարկը օրինական է: Դրանից հետո գույքի սեփականությունն անցավ կառուցապատողին, հետո գույքը քանդվեց: Քաղաքապետարանը նույն գույքի հետ կապված դիմեց դատարան՝ գույքահարկ բռնագանձելու պահանջով, բանից պարզվեց ,որ պետությունը գույքահարկ հաշվարկելու համար բոլոր երեք հարկերը օրինական է համարել ու գույքահարկ հաշվել: Մենք դիմեցինք դատարան նոր երեւան եկած հանգամանքով՝ պահանջով եթե պետությունը օրինական է համարում երեք հարկը գույքահարկ ստանալու ժամանակ, ինչու են դատարանները օրինական հաշվում մեկ հարկը, երբ փոխհատուցման հարցն է գալիս: Սա իրավական խայտառակություն է»:
Կարդացեք նաև
Հայցվոր կողմն այսօր դատարանին ներկայացրեց սեփականության իրավունքի վկայականը: Տ. Հայրապետյանն ասաց, որ իրենց գործը այս պահին նաեւ գտնվում է Եվրոպական դատարանում:
Արփինե ՍԻՄՈՆՅԱՆ
