Այսօր Ավան եւ Նոր Նորք վարչական շրջանների ընդհանուր իրավասության դատարանում, ուր նշանակվել էր ռազմական բժիշկ Վահե Ավետյանի սպանության, նրա ընկերներից 4-ին ծեծի ենթարկելու գործով դատական նիստը, տեղի չունեցավ: Պատճառը ամբաստանյալ Արման Բաղդասարյանի պաշտպան Միհրան Պողոսյանի բացակայությունն էր: Պաշտպանն այսօր գրություն էր ուղարկել դատարան՝ հայտնելով, որ ծանրաբեռնված է մեկ այլ դատական նիստով, խնդրել էր «Հարսնաքարի» գործով» այսօրվա դատական նիստը հետաձգել, միեւնույն ժամանակ հայցելով դատավարության կողմերի ներողամտությունը:
Նախագահող Դավիթ Հարությունյանը պաշտպանի բացակայությունը համարեց անհարգելի, ասելով, որ նրա կողմից չեն ներկայացվել ապացույցներ՝ այլ նիստ լինելու վերաբերյալ: Դատավորը միեւնույն ժամանակ հայտնեց, որ պաշտպան Պողոսյանի՝ հաջորդ նիստին չներկայանալու դեպքում նրա նկատմամբ կքննարկվի դատական սանկցիա կիրառելու հարցը:
Դատական հաջորդ նիստը նշանակվեց նոյեմբերի 30-ին:
Ռուզան ՄԻՆԱՍՅԱՆ
