Ոստիկանության պետ Վլադիմիր Գասպարյանի ցուցումով նոյեմբերի 6-ին եւ 7-ին միջոցառումներ են իրականացվել Տավուշի մարզում ապօրինի ծառահատումների դեպքերի բացահայտման ուղղությամբ: Միայն մեկ գիշերվա ընթացքում վեց տասնյակ բեռնատար և կիսաբեռնատար ավտոմեքենաներ են կանգնեցվել և համապատասխան տարածք տեղափոխվել:
Պաշտոններից ազատվել են ոստիկանության Իջևանի բաժնի պետը, ոստիկանության Տավուշի մարզային վարչության ծառայության բաժանմունքի պետը, ինչպես նաև Տավուշի մարզային վարչության, Դիլիջանի և Նոյեմբերյանի բաժինների չորս ծառայողներ:
Ոստիկանապետը խոստացել էր նույն հետևողականությամբ միջոցառումներ իրականացնել մյուս մարզերում: Ոստիկանության կողմից ձերբակալվել էր Տավուշի մարզի Գանձաքարի բնակիչ Սամվել Ստեփանյանը, ով իր տան բակում փայտի մշակման արտադրամաս ունի: Նրա նկատմամբ որպես խափանման միջոց ընտրվել է երկամսյա կալանքը: Գանձաքար գյուղից տեղեկացանք, որ ոստիկանությունը Սամվել Ստեփանյանի գործով սկսել է զբաղվել դեռեւս մինչեւ նոյեմբերի 6-7-ի ստուգումները:
Կարդացեք նաև
Ոստիկանության կողմից մարզում կատարված լայնածավալ ստուգումներից 20 օր անց քրեական գործեր հարուցված չեն: Մինչդեռ, ըստ օրենքի, բնությանը 200 հազար դրամ վնաս պատճառելու դեպքում հարուցվում է քրեական գործ:
Նշենք, որ ապօրինի անտառհատումների համար սահմանված բնապահպանական տուգանքները բավական բարձր են: Ոստիկանության ռեպորտաժներում ցուցադրվել են արժեքավոր ծառատեսակների փայտանյութերով բեռնատարներ, սակայն մինչ այժմ քրեական գործեր չեն հարուցվել:
Ոսկան ՍԱՐԳՍՅԱՆ
