«Առավոտի» հարցին, թե ինչպես արձագանքեց Հատուկ քննչական ծառայությունը ՀՀ իրավապահ մարմինների ղեկավար կազմի հետ ՀՀ նախագահի խորհրդակցության ժամանակ հնչեցված հարցերին, ինչ միջոցառումներ են իրականացվել, Հատուկ քննչական ծառայւթյան պետ Անդրանիկ Միրզոյանն ասաց. «Նախ նշեմ, որ Հայաստանի Հանրապետության Նախագահի աշխատակազմում իրականացված ուսումնասիրության արդյունքում վեր հանված և 2012թ. հոկտեմբերի 29-ին ՀՀ իրավապահ մարմինների ղեկավար կազմի հետ ՀՀ Նախագահի անցկացրած խորհրդակցության ընթացքում քննարկման առարկա է դարձել Հատուկ քննչական ծառայությունում քննված միայն մեկ քրեական գործ, իսկ մյուսները եղել են մարզային, ինչպես նաև Երևան քաղաքի դատախազության վերահսկողության տակ գտնվող վարչական շրջանների դատախազությունների դատավարական ղեկավարման ներքո այլ քննչական մարմիններում քննված քրեական գործեր, և, հավանաբար, կադրային փոփոխությունները պայմանավորված են հենց այդ գործերի նկատմամբ իրականացված դատախազական հսկողության ընթացքում թույլ տրված խախտումներով։ Բնականաբար, Հատուկ քննչական ծառայությունը նույնպես արձագանքել է ՀՀ Նախագահի բարձրացրած հարցերին. Ծառայությունում քննարկվել է ինչպես հիշատակված գործը, այնպես էլ՝ վերոհիշյալ խորհրդակցության ընթացքում ներկայացված հիմնախնդիրները։
Ծառայության անձնակազմի ուշադրությունը հրավիրվել է առկա խնդիրների վրա, միաժամանակ, այդպիսիք վերացնելու, ինչպես նաև քննիչների դատավարական լիազորությունների պատշաճ իրականացումն ապահովելու և դրանց ձևական իրականացման հնարավոր դրսևորումները բացառելու նպատակով տրվել են մի շարք հանձնարարականներ։ Բացի այդ, ՀՀ Նախագահի հանձնարարականի համաձայն, գրավոր առաջարկություններ ենք ներկայացրել նախաքննության կազմակերպմանը և այն սպասարկող հարակից ոլորտների, մասնավորապես՝ փորձաքննությունների կատարմանը, ինչպես նաև օպերատիվ-հետախուզական գործունեության իրականացմանն առնչվող խնդիրների համալիր լուծումների վերաբերյալ»:
Կարդացեք նաև
Անդրանիկ Միրզոյանի հետ հարցազրույցը կարդացեք վաղվա «Առավոտ» օրաթերթում
