Այսօր «Անի պլազա» հյուրանոցում քննարկում էր կազմակերպվել՝ «Քաղաքացիական հասարակության պահանջները՝ ազատ եւ արդար ընտրությունների ապահովման նպատակով»՝միջազգային կառույցների ներկայացուցիչների մասնակցությամբ:
Քննարկման ժամանակ իրենց տեսակետները ներկայացրեցին «Իրավունքի Եվրոպա միավորում», «Հելսինկյան քաղաքացիական ասամբլեայի Վանաձորի գրասենյակ», «Թրանսփարենսի ինթերնեյշնլ» կազմակեպությունները: Նրանք առաջարկեցին Ընտրական օրենսգրքում փոփոխություններ կատարել, մասնավորապես՝ արգելել լրացված քվեաթերթիկը լուսանկարելը, տեղամասերում տեղադրել տեսանկարահանող սարքեր, վեբ տեսախցիկներ, ինչպես նաեւ ընտրացուցակների հետ կապված բազմաթիվ առաջարկություններ: Այս ամենը լսելով՝ ԱԺ պետական-իրավական հարցերի մշտական հանձնաժողովի նախագահ Դավիթ Հարությունյանն ասաց, որ ինքը խմբակցության տեսակետն այս առաջարկների մասին չի ներկայացնի. «Ես կարող եմ ներկայացնել Դավիթ Հարությունյանի կարծիքը: Այն, որ առաջարկությունների մի մասը շատ հետաքրքիր է՝ դա փաստ է: Այն, որ այս առաջարկությունների մի մասն անընդունելի է, դա էլ է փաստ: Դրանց մի մասն ինձ համար մերժելի է»: Նա խոստացավ դա դարձնել քննարկման առարկա՝ ընտրություններից հետո. «Ընտրողների կողմից նման խնդիր կա իսկապես, վստահության խնդիր կա, բայց ես համաձայն չեմ այն թվերի հետ, որ հնչեցին»:
ԵԱՀԿ երեւանյան գրասենյակի ներկայացուցիչը նշեց, որ ընտրությունից առաջ Ընտրական օրենսգիրքը այնպես փոխել, որ փոխվեն խաղի կանոնները, չպետք է տեղի ունենան:
ԿԸՀ նախագահ Տիգրան Մուկուչյանը նույնպես չընդունեց ներկայացված առաջարկները: Նրա խոսքերով՝ պրակտիկորեն կիրառելը, օրինակ վեբ տեսախցիկների պահանջը, ենթադրում է այդ տեսախցիկների ձեռքբերում, տեխնիկական սարքավորումների ձեռքբերում, տեխնիկական աշխատանքի իրականացում եւ այդ ամենը՝ մի քանի ամսում. «Դա անելն ուղղակի անհասկանալի է»:
Կարդացեք նաև
Արտակ Զեյնալյանն առաջարկեց, եթե համաձայնությունը լինի, առանձին քննարկել դրանց կիրարկման հնարավորությունները:
Հռիփսիմե ՋԵԲԵՋՅԱՆ
