Ավան եւ Նոր Նորք վարչական շրջանների ընդհանուր իրավասության դատարանում արագացված դատաքննությամբ ընթացել է ազգությամբ հրեա, Ուզբեկստանի քաղաքացի, 4 անչափահաս երեխաների մայր Ներինա Պինխասովայի դատավարությունը:
Որպես կանոն, արագացված դատաքննությունների ժամանակ մեղադրյալն ընդունում է իր մեղքը, դատական քննություն տեղի չի ունենում:
Արագացված ընթացակարգին դիմում են հիմնականում ազգային անվտանգության, պաշտպանության նախարարության, ուժային կառույցների ներկայացուցիչները, որոնց դեմ հարուցված քրեական գործերով կարող են «անցնել» հանրաճանաչ անձինք:
Կարդացեք նաև
6 տարի 9 ամսվա ազատազրկման է դատապարտվել Ներինա Պինխասովան, որը, ըստ էության, իր խարդախությամբ կարողացել է կազմալուծել մեր պաշտպանության համակարգը:
Նախկինում խարդախության համար դատապարտված, պայմանական վաղաժամկետ ազատված Ներինան ներկայացել է նախկին պաշտպանության նախարար, գեներալ-գնդապետ Միքայել Հարությունյանի մտերիմ ազգական:
Նա խոստացել էր իր «բարեկամի» միջոցով ՊՆ բնակարանային ֆոնդից, շուկայականից ցածր գներով բնակարաններ «դասավորել»:
Ներինան ծանոթացել է ՊՆ բարձրաստիճան անձանց հետ, նրա ծուղակն են ընկել գաղտնի մասի պետը, մարզական վաշտի հրամանատարը, շտաբի պետի տեղակալը, ֆինանսների մասի պետը, թիկունքի գործավարը, դասակի հրամանատարներ, ենթասպաներ: Համենայնդեպս, 53 տուժողի դատարանը հնարավորություն է տվել քաղաքացիական հայցով դիմել դատարան:
Ներինային կարողացել է բացահայտել միայն նրան առաջին անգամ հանդիպած վաշտի հրամանատարը, որից նախարարի «ազգականը» ստացել էր 23 000 դոլար գումար: Վաշտի հրամանատարը ճշտել էր նրա անձը, պահանջել էր իր տված գումարը, որը վերադարձվել էր: Ի դեպ, տուժողների մեջ նշվում է նաեւ ԼՂ պաշտպանության բանակի նախկին հրամանատար Սամվել Բաբայանի անունը:
Մեր տեղեկություններով նոյեմբերի 30-ին նշանակվել է դատական նիստ՝ այս գործի հետ կապված:
Ռուզան ՄԻՆԱՍՅԱՆ
