Այսօր «Փիփլմեթր» ակումբում թիվ 1 ընտրատարածքում առաջադրված պատգամավորության թեկնածու, «Ժառանգություն» կուսակցության անդամ Ստյոպա Սաֆարյանը տեղեկացրեց, որ ամենաուշը վաղն առավոտյան ԿԸՀ-ին կդիմի՝ ՀՀԿ թեկնածուի գրանցումը չեղյալ համարելու մասին: Ըստ նրա՝ դրա համար բավականին հիմքեր կան՝ շտաբերի թվի գերազանցում, նախընտրական հիմնադրամում միջոցների անհամապատասխանություն՝ ծախսերի շուկայական արժեքին:
Ի պատասխան Aravot.am-ի հարցին, թե ի՞նչ ակնկալիքներ ունեք՝ ԿԸՀ-ն կբավարարի՞ ձեր պահանջը, նա ծիծաղեց՝ ասելով, որ իր գործը դիմելն է եւ իր իրավունքները պաշտպանելը. «Որտեղ նայում ես, նախընտրական շտաբ է: Մոտենում, հարցնում ենք, ասում են՝ սա շտաբ չի, սա ենթաշտաբ է: Բայց հո շտաբը ճուտեր չի՞ ունենում: Ամբողջ Ավանը, ամբողջ Նոր Նորքը պաստառապատված է:Պաստառները էժան հաճույք չեն: Միայն ՀՀԿ թեկնածուի պաստառների գումարը գերազանցում է այն գումարը, որը ցույց է տվել: Ամեն մի պաստառը 200 հազար դրամի չափ է, ես գիտեմ գները»:
Թեկնածուներից մեկը, որը ներկայանում է ՀԺԿ-ից՝ Էդուարդ Պետրոսյանը, ընդհանրապես նախընտրական հիմնադրամ չի բացել՝ 0 է ցույց տվել հայտարարագրում, թեեւ պաստառներ ունի փակցրած եւ ըստ Ստյոպա Սաֆարյանի, առնվազն 3 նախընտրական շտաբ ունի:
Կարդացեք նաև
Հռիփսիմե ՋԵԲԵՋՅԱՆ
