Ինչպես տեղեկացրել ենք, այսօր Գյումրիում բացվեց Ուկրաինայի հյուպատոսարան, որը կգլխավորի ջավախքահայ հայտնի գործարար Սոս Սահակյանը` «Շիրակ» ֆուտբոլային ակումբի սեփականատեր Արման Սահակյանի հայրը: Ինչպես Հայաստանում, այնպես էլ Ուկրաինայում ճանաչված գործարարի Գյումրի գալը ոչ միայն ոգևորել էր Գյումրու նորընտիր քաղաքապետ Սամվել Բալասանյանին, ով հույս ունի, թե ուկրաինական կապիտալը կհոսի Գյումրի , այլև Շիրակի թեմի առաջնորդ Միքայել եպիսկոպոս Աջապահյանին:
Նախքան հյուպատոսարանի շենքն օրհնելը, սրբազանը իր ուրախությունը այսպես հայտնեց . «Ես ձեզանից բոլորից ավելի ուրախ եմ, որովհետև այս հյուպատոսարանը բացվում է մեր եկեղեցու` «Յոթվերք»-ի հարևանությամբ, և մենք հարևաններ ենք դառնում, բացի դրանից, բացվում է իմ թաղում, որտեղ ես ծնվել, մեծացել եմ. կողքի հասցեն մեր տունն է, և ուրեմն մենք պատկից հարևաններ ենք դառնում Ուկրաինայի հյուպատոսարանի հետ: Եվ ինձ համար մեծագույն ուրախություն է տեսնել մեր բակը այսպես ավելի շքեղացած , ավելի գեղեցկացած, ուստի և ինձ համար մասնավոր ուրախության առիթ է:
Բնականաբար Ռուսաստանի և Իտալիայի հյուպատոսարանների բացումը վերջինը չպիտի լինեին, և շարունակվում է այսօր գործընթացը: Շնորհավորում ենք մեր քաղաքապետին և նաև հորդորում ենք, որ այս ընթացքը շարունակի և մեր քաղաքում նորանոր հյուպատոսարաններ բացվեն, որոնք բնականաբար և՛ բիզնեսը կխթանեն, և՛ մթնոլորտը կփոխեն և՛ Գյումրին մեկուսացումից դուրս կգա և կդառանա կենտրոն` նաև զբոսաշրջության իմաստով, նաև աշխարհին բացվելու իմաստով, որպեսզի ցանկացած զբոսաշրջիկ կամ ուխտավոր կամ պարզապես այցելու, երբ որ այս քաղաք` մեր սիրելի Գյումրի մտնի, հասկանա, որ կենտրոն է մտնում, ոչ թե պարզապես քաղաքներից մեկով եկել և անցնում է:
Կարդացեք նաև
Սրբազանը պատվավոր հյուպատոսին «բարի հարևանություն» ցանկացավ ` իր հերթին խոստանալով բարի հարևան լինել նրան: Շիրակի թեմի առաջնորդը Վիրահայոց թեմի առաջնորդ Վազգեն սրբազանի ու Ջավախքի առաջնորդական փոխանորդ հայր Բաբկենի հետ աղոթքով բացեցին հյուպատոսարանը:
Նունե ԱՐԵՎՇԱՏՅԱՆ
