Այսօր Գյումրու «Յոթվերք» եկեղեցու հարևանությամբ, բարձրաստիճան պաշտոնյաների` դատախազների, դատավորների, շիրակցի քաղաքապետերի, ԱԺ պատգամավորների ու դիվանագետների մասնակցությամբ մեծ շուքով բացվեց Ուկրաինայի հյուպատոսարան, որը ծառայելու է Շիրակի, Կոտայքի և Տավուշի մարզերին: Հետաքրքիրն այն է , որ Ուկրաինայի հանրապետությունը պատվավոր հյուպատոս նշանակեց ջավախքահայ խոշոր գործարար Սոս Սահակյանին` «Շիրակի» ֆուտբոլային ակումբի սեփականատեր, ԱԺ պատգամավորի թեկնածու Արման Սահակյանի հորը:
Պարոն Սահակյանին պաշտոնապես ներկայացրեց ՀՀ-ում Ուկրաինայի հանրապետության դեսպան Իվան Կուխտան, ով հավաքվածներին հայերեն բարևելով, ասաց. «Հարգելի հյուրեր, անցած տարի լրացավ հայ-ուկրաինական դիվանագիտական հարաբերությունների 20 տարին , չնայած պատմաբաններն ասում են, որ այս երկու երկրների ժողովուրդները շփվում են դարեր շարունակ, և ոչ մի քաղաքագետի, դիվանագետի և հասարակական գործչի չի հաջողվել այդ բարեկամությունը վերացնել, այլ ընդհակառակը ամեն մեկը ձգտում է ամրապնդել»: Նշելով, որ ինքը, որպես դեսպան, ամեն ինչ անելու է Ուկրաինայի ու Հայաստանի միջև քաղաքական, մշակութային , տնտեսական կապերը էլ ավելի խորացնելու համար, պարոն Կուխտան հայտնեց, որ այս երկրների միջև ապրանքաշրջանառությունը անցած տարի հասել է 270 միլիոն դոլարի:
Դեսպանը նաև հպարտացավ այն փաստով, որ Ուկրաինայում կա մեծ հայ համայնք, նրանց թիվը հասնում է 300-350 հազարի , որոնք բոլորը Ուկրաինայի քաղաքացիներ են: Դեսպանը շեշտեց, որ սա պատմական օր է, քանի որ առաջին անգամ Հայաստանի տարածքում, հատկապես այնպիսի հրաշալի քաղաքում, ինչպիսին Գյումրին է , բացվում է Ուկրաինայի հյուպատոսարան, որը սկիզբ է դնում երկկողմանի նոր տնտեսական հարաբերությունների:
Կարդացեք նաև
Այնուհետ ելույթ ունեցավ Գյումրու նորընտիր քաղաքապետ Սամվել Բալասանյանը, ով ևս ակնկալեց, որ հյուպատոսարանի բացմամբ նոր ներդրումներ կկատարվեն Հայաստանում, հատկապես Գյումրիում , և որ ուկրաինական կապիտալը կհոսի Գյումրի, նոր աշխատատեղեր կստեղծվեն քաղաքում: Քաղաքապետը նաև տեղեկացրեց, որ մեր հանրապետությունում մոտ 83 ձեռնարկություններ գործում են ուկրաինական կապիտալով, թեև ըստ նրա, Հայաստանի ու Ուկրաինայի միջև ապրանքաշրջանառությունը այնքան էլ մեծ չէ , մոտ 268 միլիոն է. ՀՀ-ից քիչ ապրանքատեսակներ են արտահանվում:
Նշենք, որ Սահակյանները Ջավախքից են , հետևաբար և այստեղ էին հավաքվել ջավախքահայ շատ ու շատ հայտնի դեմքեր, այդ թվում և բարձրաստիճան պաշտոնյաներ: Սամվել Բալասանյանը Ջավախքի մեծահարուստներին ևս հասկացրեց գալ ու Գյումրիում ներդրումներ կատարել,այսպես ասած գյումրեցիների մատից փուշ հանել:
Նունե ԱՐԵՎՇԱՏՅԱՆ
