Քաղաքագետ Լեւոն Շիրինյանի կարծիքով, ԲՀԿ առաջնորդ Գագիկ Ծառուկյանը առաջիկա նախագահական ընտրություններում առաջադրվելու է: «Երկար ժամանակ քաղաքական ոլորտը ուսումնասիրում էին, ինձ թվում է՝ նպատակը մեկն էր՝ ուղարկել մեսիջ, ստանալ արձագանք, կայացնել որոշում: Ինչու են այդ լուրը շրջանառության մեջ դնում, նայում են պահանջարկ կա՞, թե՞ չկա: Նաիրա Զոհրաբայանը հենց այնպե՞ս է պնդում, որ Ծառուկյանը առաջադրվելու է: Ինձ թվում է՝ խորհրդակցություն է եղել»,- այսօր ասուլիսի ժամանակ ասաց քաղաքագետը:
Նա վստահեցրեց, որ այլընտրանքը իսկական դասական իմաստով ընդդիմությունն է ու հավելեց. «Ես ուզում եմ, որ նա անպայմանորեն լինի: Կհաղթե՞ն , թե՞՝ ոչ, քաղաքական իրականությունը ցույց կտա, բայց Հայաստանի քաղաքական գործընթացը առաջ կգնա»:
Պարոն Շիրինյանի խոսքերով, ՀՀԿ-ն օգտվում է ընդդիմության լռությունից. «Իշխող կազմակերպությունն աշխատում է ժամանակի վրա, ինչքան ձգձգվի , այնքան՝ լավ: Ըննդդիմությունը չի կարողանա կազմակերպվել, չեն գա համաձայնության եւ այդ ուղղությամբ մեծ աշխատանք են տանում»:
Նա չբացառեց ընտրությունների 2-րդ փուլը եւ ընդդիմության միասնական թեկնածուի գործոնը. «Տակտիկայի հարց է միասնական թեկնածուն: Կնստեն, կնայեն, եթե միասնականով կարող են հաղթել, կանեն, իսկ դժվար թե այդպես լինի, որովհետեւ ՀՀԿ-ն խորը արմատներ ունի, կազմակերպված է , դրա համար քաղաքական ուժերը երեւի ցրված սպեկտորով կգնան»:
Կարդացեք նաև
Ինչ վերաբերում է հետընտրական զարգացումներին, պարոն Շիրինյանը չի ակնկալում. «Եթե Սահակաշվիլին չարեց, կարծում եմ ասյտեղ էլ չի լինի»:
Հարցին, թե հավանական համարո՞ւմ է խոսակցությունները, թե ՀՀԿ-ԲՀԿ բանակցություններ են գնում վարչապետի պաշտոնի շուրջ, եթե ԲՀԿ-ին խոստանան այդ պաշտոնը, ԲՀԿ-ն հանդես չի գա սեփական թեկնածուով, պարոն Շիրինյանը պատասխանեց. «Նախընտրական խոստումները , որպես կանոն, Հայաստանում չեն իրականանում: Պետք է իմանանք այդ խոսակցությունների աղբյուրը որն է. իմ կարծիքով, իշխանական կողմն է տարածում: Բայց մի բան էլ կա. ԲՀԿ-ին պետք է հիշեցնենք, որ մեզ խոստում է տվել, որ համաձայնության գնալու են, իսկ գործարքների ՝ ոչ: Կարծում եմ, որ դա չի լինելու: ՀՀԿ-ն բացարձակ մեծամասնություն է կազմում, ինչու պետք է վարչապետությունը տան: Աշխարհում փողը, իշխանությունը չեն տալիս, վերցնում են պայքարով»:
Արփինե ՍԻՄՈՆՅԱՆ
