Այսօր՝ նոյեմբերի 23-ին, Ոստիկանության քննչական գլխավոր վարչության Երևանի քննչական վարչության Նոր Նորքի քննչական բաժնում քննիչ Տիգրան Հակոբյանի կողմից հարուցվել է քրեական գործ՝ ՀՀ Քրօր-ի 110 հոդվածի (ինքնասպանության հակելը) հատկանիշներով:
Ինչպես shamshyan.com-ի հայտնում է ֆոտոլրագրող Գագիկ Շամշյանը, նշված քրեական գործը հարուցվել է այսօր ժամը 16:00-ի սահմաններում Ավան վարչական շրջանի Նարեկացի 40 շենքի բակում հայտնաբերված 13-ամյա Է. Սարգսյանի դիակի փաստով:
Ֆոտոլրագրողը հայտնում է, որ աղջիկը սովորում էր Երևանի Սաֆարյանի անվան 171 դպրոցում և նշված շենքում բնակվում էր հոր, մոր և ավագ եղբոր հետ: Պարզվում է, իրենք բնակվում էին նշված շենքի 2-րդ հարկում, իսկ 11-րդ հարկում, որտեղ տեղի է ունեցել դժբախտ դեպքը, բնակարանը պատկանել է Է. Սարգսյանի տատիկին և պապիկին, որոնք գտնվում են Միացյալ Նահանգներում: Ոստիկանությունը դեպքի վայրում երկու վարկածի ուղղությամբ էր աշխատում, դժբախտ պատահարի և ինքնասպանության:
Գ. Շամշյանը հայտնում է, որ, իր տեղեկություններով, աղջկա մայրը ոստիկաններին հայտնել է, որ աղջիկը օգտվում էր համակարգչից, որտեղից նա ավելի շատ դիտում էր սատանայական տեսահոլովակներ: Ի դեպ, մայրը անընդհատ նախատել է աղջկան, որպեսզի նա նման տիպի տեսահոլովակներ, ֆիլմեր ու մուլտեր չնայի:
