«Իրականությանը չեն համապատասխանում վերջերս որոշ լրատվամիջոցների կողմից հաճախակի, կարծում եմ, արդեն խիստ նպատակային, շրջանառության մեջ դրվող այն տեղեկությունները, որ Կարեն Դեմիրճյանը եւ Վազգեն Սարգսյանն իրենց գործունեության վերջին շրջանում որոշել էին վերանայել ՀՀ-ի արտաքին քաղաքական կուրսը եւ արեւմտամետ կուրս վարել»,- Aravot.am-ի հետ զրույցում հայտարարեց Հայաստանի աշխատավորական սոցիալիստական կուսակցության նախագահ Մովսես Շահվերդյանը:
Նկատենք, որ վերջերս տարբեր հրապարակումներում խոսվում է այն մասին, որ նման որոշման Դեմիրճյանը եւ Սարգսյանը հանգել էին ԱՄՆ կատարած այցից հետո: Մովսես Շահվերդյանը հիշեցնում է, որ ԱԺ-ում իր պաշտոնավարման ընթացքում Կարեն Դեմիրճյանը երկու երկիր է այցելել՝ Գերմանիայի Դաշնություն եւ ՌԴ: ԱՄՆ այցելել է միայն Վազգեն Սարգսյանը: Շահվերդյանի պնդմամբ, ԱՄՆ-ից վերադառնալուց հետո Վազգեն Սարգսյանն իր այցի արդյունքները մանրամասնորեն եւ հանգամանալից պատմել է Կարեն Դեմիրճյանին, իսկ վերջինս դրանց մասին իրազեկել է նաեւ իրեն: «Այս պահին ես նպատակահարմար չեմ գտնում ասել այդ զրուցի մանրամասները, բայց անհրաժեշտության դեպքում կասեմ՝ բառ առ բառ»,- ասաց Շահվերդյանը՝ հավելելով, որ ինքը Կարեն Դեմիրճյանին վերջին անգամ հանդիպել է հոկտեմբերի 5-ին կամ 6-ին, որից հետո Դեմիրճյանը մեկնել է Մոսկվա, որտեղ հանդիպումներ է ունեցել ՌԴ այն ժամանակվա վարչապետ Վլադիմիր Պուտինի, տնտեսական բլոկը ներկայացնող նախարարների հետ:
«Մենք Կարեն Սերոբիչի հետ պետք է հանդիպեինք հոկտեմբերի 28-ին, Մոսկվայում լուրջ որոշումներ պետք է կայացվեին: Ասեմ, որ հոկտեմբերի սկզբին կայացած մեր հանդիպումը տեւել է երեք ժամ: Արտաքին քաղաքական կուրսի փոփոխության մասին որեւէ հարց չէր կարող լինել, այն էլ՝ Կարեն Դեմիրճյանի մոտ: Եվ մանավանդ, նրա շատ հաջողված այցը Մոսկվա, նման տրամադրություններ երբեք չէր կարող ստեղծել: Իսկ մոսկովյան այցը, ես գիտեմ, որ շատ հաջողված էր: Այնպես որ, նման տեղեկությունները, որոնք այսօր փորձում են շրջանառության մեջ դնել, իրականության հետ ոչ մի կապ չունեն»,- ասում է Մովսես Շահվերդյանը, ով համարվում էր Կարեն Դեմիրճյանի մտերիմներից:
Կարդացեք նաև
Նելլի ԳՐԻԳՈՐՅԱՆ
