Այսօր «Արմատ» ակումբում ԵՊՀ պատմության ֆակուլտետի դեկան Էդիկ Մինասյանն անդրադարձավ երեկ համալսարանում «Հակահարված» նախաձեռնության անդամների հետ կապված միջադեպին: «Երեկ` ժամը 13:15-ի սահմաններում, բարձրախոսով եւ տեսախցիկներով մի խումբ երիտասարդներ ներխուժեցին պատմության ֆակուլտետ եւ ապօրինի գործողություններ կատարելով` խաթարեցին ֆակուլտետի բնականոն աշխատանքը, ոտնահարեցին ուսանողների կրթության իրավունքը: Նրանք անհարկի աղմուկ էին բարձրացնում, անկարգություններ անում եւ պահանջում իշխանությունների զավթած ռեժիմի տապալում: Ես այդ ժամանակ դասի էի. աղմուկ լսելով` դուրս եկա միջանցք, եւ առհասարակ` ուսանողությունը եւ դասախոսները նույնպես դուրս էին եկել միջանցք: Փորձեցի կարգի հրավիրել անկարգություններ անողներին: Հարցրեցի, թե արդյոք ուսանող են, բայց ինձ պատասխանեցին` «բա դու ինչացու ես»: Պատասխանեցի, որ ֆակուլտետի դեկանն եմ, ինձ ասացին` «պետք էլ չի ասել, թե մենք ով ենք», ու էլի սկսեցին վազվզել միջանցքում եւ գոռալ` «ոտքի կանգնեք»: Որպես դեկան սկսեցի կանչել նրանց, բայց չմոտեցան ու ասացին, թե` «խանգարում ենք, լավ ենք անում»:
Սահմանադրորեն արգելված է բուհում քաղաքական կոչեր անել եւ համալսարանը որպես քաղաքական բեմահարթակ օգտագործել: Համալսարանի ներքին կանոնադրության համաձայն` արգելվում է բուհում քաղաքական ակցիաներ իրականացնել: Համալսարան ներխուժածները նաեւ ծխել են: Ցավում եմ, որ ապատեղեկատվություն տարածվեց, թե ես բռնություն եմ գործադրել նրանց հանդեպ»,- ասաց Մինասյանը:
Լուիզա ՍՈՒՔԻԱՍՅԱՆ
