Վերջերս ներկայացված օրենքի նախագիծը, ըստ որի կվերաբաժանվեն Թուրքիայի վարչատարածքային սահմանները, իր ազդեցությունը կունենա Թուրքիայում հայերով բնակեցված միակ գյուղի վրա: Հայտնում է «Հյուրիեթ դեյլի նյուզ» թերթը:
Թուրքիայի Հաթայ նահանգում գտնվող Վաքըֆլը (հայ. անունը Վակըֆ) գյուղը, որն ունի 135 բնակիչ, նոր օրենքի համաձայն կկորցնի իր «հատուկ» կարգավիճակը:
Վակըֆի համայնքի ղեկավար Ջեմ Չափարը «Հյուրիեթ»-ի հետ զրույցում ասել է, որ գյուղի գոյությունը կարևոր է և’ նրանց, և’ Թուրքիայի պատկերի համար. «Հույս ունեմ, որ մեր իրավունքները կպաշտպանվեն օրենքով սահմանված կարգով», – ասել է Չափարը` բացատրելով, որ օրինագիծն ընդունելու դեպքում այս գյուղը կմտնի մի այլ վարչական միավորի մեջ` վերածվելով թաղամասի – «Սա նշանակում է, որ Վաքըֆլըն կկորցնի գյուղի կարգավիճակը ու այլևս չի լինի միակ հայկական գյուղը Թուրքիայում: Մենք այդ հարցով դիմել ենք Հաթայի նահանգապետ Ջելալեթթին Լեքեսիզին, ինչպես նաև արդարադատության նախարար Սադուլլահ Էրգինին»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
