Նոյեմբերի 20-ին կայացել է Տավուշի մարզի Բերդ քաղաքի ավագանու նիստ, որը չեղյալ է համարել Մաշտոցի 26 բազմաբնակարան շենքին հարող մանկական խաղահրապարակի տարածքը 13 հոգուն օտարելու եւ Դավիթ-Բեկ փողոցի 50 հասցեում գտնվող մայթի 60 քառակուսի մետր տարածքը 50 տարով, կառուցապատման իրավունքով, տարեկան 60 հազար դրամ վարձավճարով հատկացնելու որոշումները:
Մայթի 60 քառակուսի մետրը հատկացվել է 3 անձանց անուններով՝ յուրաքանչյուրին 20-ական քառակուսի մետր, սակայն տնօրինվել է նրանցից մեկի՝ Բերդի բնակիչ Սերյոժա Դանիելյանի կողմից:
«Առավոտը» նախկինում տեղեկացրել է, որ 2012թ. հունվարի 30-ին Բերդ համայնքի ավագանին նախկին քաղաքապետ Անդրանիկ Շառյանի առաջարկով հավանություն է տվել քաղաքի մանկական խաղահրապարակի տարածքի օտարմանը, այդ որոշումը հարուցել էր բնակիչների դժգոհությունը: Ուշագրավ է, որ մանկական խաղահրապարակի եւ փողոցի մայթի տարածքի հատկացման որոշումներն ընդունվել են ավագանու ներկայիս կազմի կողմից:
Նիստում ավագանու անդամները հայտարարել են, թե իրենք տեղյակ չեն եղել իրենց կայացրած որոշումներից:
Կարդացեք նաև
2012թ. սեպտեմբերի 23-ին Բերդում կայացած ընտրությունների արդյունքում փոխվեց համայնքի ղեկավարը, քաղաքապետ ընտրվեց Հարություն Մանուչարյանը:
Այս տարի Բերդում ավագանու ընտրություններ տեղի չեն ունեցել, դրանք կկայանան հաջորդ տարվա աշնանը:
Ոսկան ՍԱՐԳՍՅԱՆ
