Այս տարի 43 մահացության դեպք է գրանցվել Զինված ուժերում, որից 12-ը՝ հրադադարի ռեժիմի խախտման արդյունքում: Այսօր «Անպատժելիության համակարգային դրսեւորումները եւ դրանց ազդեցություններն իրավունքի գերակայության վրա Հայաստանում» քննարկման ժամանակ ներկայացրեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը. « Եթե նախորդ ժամանակներում տարանջատում էինք հրադադարի ռեժիմի հետեւանքով մահացության դեպքերը մնացած դժբախտ պատահարներից, ուրեմն ասեմ, կարծում եմ, մենք մեթոդական սխալ ենք թույլ տվել. Այդ դեպքերն էլ պետք է արժանան քննության, արդյոք ապահովվե՞լ են անվտանգության պատշաճ կանոնները: Այն քրեական գործերով, որոնց հետեւում ենք, հրամանատարության պատասխանատվությունը հանգամանքների ստեղծման մեջ, որը հանգեցրել է ողբերգական արդյունքների, անդրադարձ չկա: Լավագույն դեպքում ծառայողական քննության ընթացքում թերություններ են հայտնաբերվում, նկատողություն են տալիս կամ տեղափոխում այլ պաշտոնի»:
Նա , որպես անպատժելիության օրինակ բերեց նաեւ քրեակատաողական հիմնարկներում արձանագրվող մահացության դեպքերը. «Մահացության դեպքերով քննություններ չեն կատարվում, քրեական գործեր չեն բացվում: Քրեակատարողական համակարգի ֆինանսավորումը պետութան կողմից պայմանավորված չէ իրական կարիքների գնահատականի հիման վրա: Մահացության դեպքերի մեծ մասը առողջական խնդիրների հետեւանքով են , բայց բժշկական ծառայությունների համար հատկացված բյուջեի տողերը մի տոկոսի էլ չեն հասնում: Հարազատներն էլ չեն համարձակվում բողոքարկել»:
Պարոն Սաքունցը դժգոհեց նաեւ դատական համակարգի անկախությունից. «Մտահոգիչ է դատական իշխանության անկախության բացակայությունը: Դատարանը հանդես է գալիս պաշտոնյաների կողմից, հանցագործությունները կոծկողի նոտարական վավերացնողի դերում: Հայաստանում կա անպատժելիության անձեռնմխելիության սկզբունքը, եթե որեւէ մեկը կպնի այդ անպատժելիությանը՝ ուրեմն խախտում է սկզբունքը: Որոնք խախտում են այդ սկզբունքը հենց իրենց ներսում՝ նրանց նկատմամբ քրեական գործեր են հարուցվում: Ովքե՞ր են այդ խախտողները՝ իրենց հետ չհամաձայնեցված կոռուպցիոն գործողություններ կատարողները, քաղաքական գործիչները եւ մենք՝ գրանտակերներս, որի վերաբերյալ այսօր հաշվետվություն եմ տալիս»:
Կարդացեք նաև
Արփինե ՍԻՄՈՆՅԱՆ
