Բնապահպան ակտիվիստները պահանջում են Խոսրովի արգելոց ՊՈԱԿ տնօրենի թափուր պաշտոնի համար այսօր նախատեսված մրցույթը չեղյալ հայտարարել: Այսօր ասուլիսի ժամանակ «Թռչկան» քաղաքացիական նախաձեռնության իրավաբան Մերի Խաչատրյանը պատմեց, որ հոկտեմբերի 17-ին հայտարարված մրցույթի մասնակիցների անունները նոյմեբերի 7-ի դրությամբ ներկայացված չեն եղել: «Երբ պահանջեցինք ցանկը, բնապահպանության փոխնախարար Խաչիկ Գալստյանն ասաց, որ , ամենայն հավանականությամբ, չեղյալ է հայտարարվելու մրցույթը, որովհետեւ դեռ մեկ թեկնածու կա, բայց 2 օր անց նախարարության պաշտոնական կայքէջում մրցույթի հայտարարության տակ երեք դիմորդների տվյալներ հրապարակվեցին: Զանգում ենք փոխնախարարին, կրկին նա ասում է, որ, ամենայն հավանականությամբ, չեղյալ կհայտարարվի, որովհետեւ երեք թեկնածուների փաստաթղթերն էլ չեն համապատասխանում պահանջվող չափանիշներին»,-ասաց Մերի Խաչատրյանը:
Ակտիվիստների տվյալներով` դիմորդներից մեկը Արտաշատ համայնքի ավագանու անդամ, Նոնո մականունով Գաբրիել Պողոսյանն է, որը միջնակարգ կրթություն ունի:
Ակտիվիստ Աննա Շահնազարյանն էլ ասաց, որ երեք թեկնածուներից մեկը ինքնբացարկ է ներկայացրել, բայց նրա ինքնաբացարկի մասին կայքում չի ներկայացվել: Նա ասաց, որ իրենք դիմել էին նախարարություն՝ մրցույթի ժամկետները երկարաձգելու համար, որ կարողանան իրենց թեկնածուների փաստաթղթերը ներկայացնել, բայց ժամկետները չեն երկարաձգվել ու իրենք զրկվել են իրենց թեկնածուներին ներկայացնելու հնարավորությունից: Մ. Խաչատրյանն էլ հավելեց, որ փոխնախարարը հորդորել է խախտել օրենքը, ասել է` ոչինչ, դուք մինչեւ նոյեմբերի 12-ն էլ կարող եք ներկայացնել ձեր թեկնածուների փաստաթղթերը, մինչդեռ դիմումների վերջնաժամկետը նոյեմբերի 7-ն էր:
Կարդացեք նաև
Ակտիվիստ Եղիա Ներսիսյանն էլ հավելեց. «Նախարարությունն ապացուցում է, որ ոչինչ չեն անում: Այդքան փողեր է գալիս Խոսրով, մտնում ես Խոսրով, տեսնում ես ոչ մի գումար չի ծախսվել: Երկու հատ վիլիս են առել, երեք հատ չորացած ձի կա այնտեղ»:
Արփինե ՍԻՄՈՆՅԱՆ
