«Հայաստանի քաղաքական եւ տնտեսական մեկուսացումը արդյունքներ է տալիս, եւ Ադրբեջանը շարունակելու է ուժեղացնել այդ մեկուսացումը»,- Ադրբեջանի նախագահ Իլհամ Ալիեւի այս հայտարարության մեջ ճշմարտություն է տեսնում «Նոր ժամանակներ» կուսակցության նախագահ Արամ Կարապետյանը: «Կա ճշմարտություն, ով էլ ուզում է ասեր, իսկապես այդպես է: Ինչքան ես գիտեմ, Ադրբեջանը չերեւացող բանակցություններում մեծ փող է խոստանում Վրաստանին, եթե աբխազական երկաթգիծը չբացվի: Այդ աշխատանքը Ադրբեջանը կատարում է»,- Aravot.am-ին ասաց պարոն Կարապետյանը:
Անդրադառնալով Ի. Ալիեւի մեկ այլ հայտարարության, թե Ադրբեջանը տարեցտարի հզորանում եւ ամրապնդվում է, մինչդեռ Հայաստանը ամեն տարի թուլանում եւ անկում է ապրում, պարոն Կարապետյանը չհամաձայնեց.«Ադրբեջանում աճ չկա, նավթային ռեսուրսների հետ կապված խնդիրները գնալով ավելանում են: Գեոքաղաքական բավականին ծանր կացության մեջ է հայտնվել հենց իր կլանը, եւ դա գալիս է նաեւ տնտեսական խնդիրներից: Սրվել են Ադրբեջանի հարաբերությունները ռուսական եւ իրանական էլիտայի հետ, պետք չէ նայել՝ ինչպես են իրար գրկում, փաթաթվում: Ադրբեջանն էլ մեծ քանակությամբ խնդիրներ ունի եւ ունենալու է, մասնավորապես նավթային ռեսուրսների հետ կապված: Նավթը մի կողմից լավ է, մյուս կողմից՝ գլխացավանք, եթե պետությունը մեծ զինված ուժեր չունի պահպանելու համար: Ինչքան գիտեմ, Ադրբեջանը հիմա բանակցություններ է վարում, որ ՆԱՏՕ-ի խաղաղապահները ոչ թե խաղաղապահ, այլ ինչ-որ այլ ձեւով մուտք գործեն իրենց գազամուղներն ու նավթամուղները պահելու համար: Պարզ է, որ Ադրբեջանը հիմա վախենում է պատերազմից՝ ոչ միայն Հայաստանի, այլեւ Իրանի շուրջ զարգացումներից ելնելով: Այնպես որ, խորհուրդ կտայի Ալիեւին հանգիստ վերաբերվել նաեւ իրենց մոտ գնացող գործընթացներին: Չի կարելի պատերազմական հարցով խնդիր լուծել, միայն փողը պատերազմում շատ քիչ է»:
Կարդացեք նաև
Արփինե ՍԻՄՈՆՅԱՆ
