Իջեւանի քաղաքապետարանը Տավուշի մարզի ընդհանուր իրավասության դատարան հայց է ներկայացրել ընդդեմ «Իջեւանի շուկա» ՍՊԸ-ի, որով պահանջում է շուկայի հետ քաղաքապետարանի 2005 թ. մարտի 14-ին կնքած պայմանագիրը եւ որպես հետեւանք նույն օրը իրականացված անշարժ գույքի պետական գրանցումը եւ այդ իրավունքի գրանցման վկայականը համարել անվավեր:
Դատավոր Արման Կուրեխյանը հոկտեմբերի 10-ին մերժել էր քաղաքապետարանի հայցը, քանզի քաղաքապետարանը 4000 դրամ պետական տուրք էր մուծել, մինչդեռ իր երկու պահանջի համար պետք է մուծեր 8000 դրամ, դատարան չէր ներկայացրել նաեւ պետական տուրքի վճարման ժամկետը երկարաձգելու կամ դրույքաչափը նվազեցնելու միջնորդություն: Քաղաքապետարանի կողմից պետական տուրքը պատշաճ մուծելուց հետ նոյեմբերի 13-ին կայացել է դատական նիստ:
Երկրորդ նիստը տեղի է ունեցել նոյեմբերի 20-ին: Երկու նիստերին էլ քաղաքային շուկայի տնօրենը կամ նրա ներկայացուցիչը դատարան չեն ներկայացել: Նոյեմբերի 20-ի նիստին չի ներկայացել նաեւ քաղաքապետարանի շահերը ներկայացնող փաստաբան Խաչիկ Զաքարյանը: Որպես քաղաքապետարանի ներկայացուցիչներ, դատարան էին ժամանել քաղաքապետարանի քաղաքաշինության բաժնի գլխավոր մասնագետ Արամ Մելիքսեթյանը եւ քաղաքապետարանի ճարտարապետ Մարզպետ Ալիխանյանը: Դատավոր Կուրեխյանը նրանց հարցրել է , թե արդյոք նրանք դատարան են բերել իր կողմից նախորդ նիստի ժամանակ պահանջված, քաղաքապետարանի հայցը հիմնավորող լրացուցիչ փաստաթղթերը: Քաղաքապետարանի աշխատակիցները հայտարարել են,որ այդ փաստաթղթերը փաստաբան Խաչիկ Զաքարյանի մոտ են գտնվում: Դատավորը դատը հետաձգել է եւ հաջորդ նիստը նշանակել նոյեմբերի 27-ին:
Հավելենք, որ շուկայի տնօրեն Գառնիկ Օհանյանը նախկին քաղաքապետ Վարուժան Ներսիսյանի հարեւանն ու մտերիմն է, Գ. Օհանյանի որդին՝ Նարեկը, լինելով ավագանու անդամ, չի ներկայանում ավագանու նիստերին: Քաղաքապետ Վ. Ղալումյանը շուկայի տարածքի ընդլայնումը համարում է անօրինական, Գառնիկ Օհանյանն էլ համարում է, որ քաղաքային եկեղեցու հարեւանությամբ գյուղմթերքների առեւտուրը հակասանիտարական պայմաններում է կատարվում: Քաղաքապետ Վարդան Ղալումյանն ասում է, որ այդ տարածքում մթերքների առեւտուրը ավագանու որոշմամբ է սահմանված:
Կարդացեք նաև
Ոսկան ՍԱՐԳՍՅԱՆ
