Այսօր տեղի ունեցավ Գյումրու նորընտիր ավագանու անդրանիկ նիստը, որը, շնորհիվ Գյումրու ժուռնալիստների «Ասպարեզ» ակումբի նախագահ Լևոն Բարսեղյանի, ուղիղ եթեր հեռարձակվեց: Գյումրու պատմության մեջ թերևս առաջին անգամն էր, որ բոլոր լրատվամիջոցներին` առանց խտրականության, հրավիրել էին այն լուսաբանելու:
Օրակարգում 12 հարց կար, այդ թվում` ֆինանսատնտեսական աուդիտ հրավիրելու հարցը , որի մասին, դեռ քաղաքապետ չընտրված, բարձրաձայնում էր Սամվել Բալասանյանը, սակայն, չգիտես ինչու, այսօր այդ հարցը քննարկումից դուրս հանվեց: Սա փոքր-ինչ ապշեցրեց ավագանու անդամներին, սակայն Սամվել Բալասանյանը շտապեց պարզաբանումներ տալ. «Այդ հարցը օրակարգից դուրս հանելու պատճան այն է, որ այս պահին ֆինանսների նախարարության վերահսկողական տեսչությունը երկու հանձնարարականով գտնվում է քաղաքապետարանում և ստուգումներ անցկացնում տարբեր ուղղություններով: Մեկը փաստորեն քաղաքացու դիմումի հիման վրա է, որի հետ կապված քննչական գլխավոր վարչությունը հարուցել է քրեական գործ, և երկրորդը` պլանային ստուգումներ: 2-րդ` լիազոր մարմինը փաստորեն նաև հանձնարարական է տվել մեր մարզպետարանին, և հիմա մարզպետարանի բոլոր վարչությունները էստեղ աշխատում են , ստուգման ընթացքի մեջ են, որովհետև ամենքին 15 օր է տրված, հիմա կարծեմ 5 օր է ` էստեղ են ֆինանսների նախարարության ստուգողները, իսկ լիազոր մարմինը` մեկ շաբաթ: Եվ 3-րդ` մենք էս պահին, ըստ ՏԻՄ օրենքի, իրականացնում ենք գույքագրում , գույքագրում ենք, որպեսզի հասկանանք ինչ ունենք: Նույնիսկ տեղ չկա, եթե հիմա ինչ- որ աուդիտորական անկախ կազմակերպություն հրավիրենք էստեղ, հնարավորություն չենք ունենա, նույնիսկ տեղ չենք ունենա նստելու:Ասեմ շենքը բավականին լուրջ սենյակներ ունի , բայց շենքի կեսը վերանորոգված չէ, դրա համար նիստերը անցկացվում են քաղաքապետի կաբինետում, այսինքն հարմարություններ չկան,այսինք էս է պատճառաբանությունը:Ստուգման արդյունքում մենք կունենանք ֆինանսների նախարարության համապատասխան եզրակացությունը, և եթե փող պետք է ծախսեինք, որ շատ ուղղություններով աուդիտը գար ստուգեր, մենք էդ մասերը կհանենք, և հետագայում կհրավիրենք էն խնդիրների շուրջ, որոնք բաց կմնան», -ռեuիզոր չհրավիրելու անհրաժեշտությունը այսպես փորձեց համոզել Գյումրու նորընտիր քաղաքապետը:
Հարցը դրվեց քվեարկման, ու ավագանու 21 անդամներից ընդամենը մեկը` Լևոն Բարսեղյանը, դեմ եղավ քաղաքապետին:
Նշենք, որ քաղաքապետի պարզաբանումը անկեղծ ու համոզիչ չէր, ակնհայտ է, որ այստեղ ճնշումներ են եղել նրա նկատամամբ, այլապես հենց ինքն էր շահագրգիռ ռեվիզորներ հրավիրելու: Մեր աղբյուները փոխանցում են, որ այս պահին քաղաքապետարանում Վարդան Ղուկասյանի գործերը ստուգող ֆինանսների նախարարության վերհասկողական տեսչությունն անգամ չի պատրաստվում խախտումներ արձանագրել:Թեև ստուգողները ընկերական հայտարարում են , թե Ղուկասյանի ամեն մի փաստաթուղթ իր մեջ քրեական գործ հարուցելու հիմքեր ունի, այդուհանդերձ նրանց հրահանգված է լռել: Սա թերևս կարելի է բացատրել նրանով, որ 3 ամսից նախագահական ընտրություններ են, իսկ Վարդան Ղուկասյանի պես հզոր թիմ ունեցող անձնավորության հետ այդքան էլ հեշտ չէ առճակատման դուրս գալը:
Կարդացեք նաև
Նունե ԱՐԵՎՇԱՏՅԱՆ
