ԱԺ պատգամավոր , ԱԺ ֆրանկոֆոնիայի հանձնախմբի ղեկավար Մարգարիտ Եսայանը Շվեյցարիայի Մոնթրո քաղաքում այս օրերին մասնակցում է ֆրանկոֆոնիայի խորհրդարանական վեհաժողովի Եվրոպայի տարածաշրջանային տարեկան կոնֆերանսին:Այս վեհաժողովին մասնակցում են Եվրոպայի ֆրանկոֆոնիայի անդամ պետությունների խորհրդարանների ֆրանսախոս հանձնախմբերի ներկայացուցիչները, շուրջ իննսուն պատվիրակ: Կոնֆերանսի շրջանակներում Մարգարիտ Եսայանն առանձին հանդիպում է ունեցել նաեւ Ֆրանկոֆոնիայի ԽՎ-ի եվրոպայի տարածաշրջանի նախագահ պարոն Ժան Պիեռ Վալի հետ: Հանդիպման ընթացքում խոսվել է Հայաստանի խորհրդարանի` ֆրանկոֆոնիայի ԽՎ մշտական անդամ դառնալու հնարավորությունների մասին:
Aravot.am-ի հետ զրույցում տիկին Եսայանը պատմեց. «Պարոն Ժան Պիեռ Վալը ասաց, որ թեպետ, որեւէ երկրի խորհրդարանին մշտական անդամի կարգավիճակ տալու համար հարկավոր է, որ տվյալ երկրում պաշտոնական լեզուներից մեկը լինի ֆրանսերենը, սակայն, հույս հայտնեց, որ իրենք կփորձեն դիտարկել այս հարցի լուծման հնարավորությունները, եւ բացառություն անել Հայաստանի խորհրդարանի համար: Պարոն Վալը զրույցի ընթացքում նաեւ առաջարկեց դիտարկել 2014-ին ֆրանկոֆոնիայի խորհրդարանական վեհաժողովի տարեկան լիագումար նստաշրջանը Հայաստանում անցկացնելու հնարավորությունը: Ի դեպ, ուզում եմ ասել, որ ֆրանկոֆոնիայի ԽՎ անդամ երկրների պատվիրակները այս օրերին մեծ հաճույքով են հիշում դեռ 2010-ին Հայաստանում անցկացված ֆրանկոֆոնիայի ԽՎ տարեկան համաժողովը, հայկական հյուրասիրությունը եւ հյուրընկալությունը»:
Նելլի ԳՐԻԳՈՐՅԱՆ
