Մինսկի խմբի համանախագահները, արխիվ
ԵԱՀԿ-ի Մինսկի խմբի համանախագահները հինգշաբթի օրը Ստեփանակերտում հանդիպեցին Լեռնային Ղարաբաղի նախագահ Բակո Սահակյանի հետ։
Հանդիպումից հետո «Ազատություն» ռադիոկայանի հարցին ի պատասխան` ռուսաստանցի համանախագահ Իգոր Պոպովը փոխանցեց, որ Ղարաբաղի նախագահի հետ քննարկել են հակամարտության կարգավորմանն առնչվող խնդիրները, ինչպես նաեւ խոսել են ադրբեջանցի մարդասպան Ռամիլ Սաֆարովի արտահանձնման եւ հայրենիքում նրա փաստացի հերոսացման դեպքից. միջնորդները այդ հարցի առնչությամբ կարծիք չհայտնեցին, ոչ էլ նոր բան ասացին, բոլոր հարցերին պատասխանեցին՝ բացառապես հղում անելով նախկինում արված հայտարարություններին:
Ստեփանակերտի օդանավակայանի մասին «Ազատություն» ռադիոկայանի այն հարցին, թե ինչպես են համանախագահները տեսնում այդ խնդրի լուծումը, Պոպովը պատասխանեց . – «Մենք կարծում ենք, որ Ստեփանակերտի օդանավակայանի վերագործարկումը տվյալ իրավիճակում կարող է լարվածություն առաջացնել կողմերի միջեւ. եւ միեւնույն ժամանակ մենք կարծում ենք, որ այդ հիմնախնդիրը պետք է կարգավորվի դիվանագիտական ճանապարհով, հաշվի առնելով եղած փորձը»։
Իսկ հարցին` չէի՞ն ցանկանա իրենք լինել առաջին ուղեւորները, ռուսաստանցի միջնորդը արձագանքեց կատակով. – «Դեռ ոչ, օդանավը դեռ չի ժամանել»:
Կարդացեք նաև
Համանախագահները ուրբաթ օրը Երեւանում եւ երկուշաբթի օրը Բաքվում Հայաստանի եւ Ադրբեջանի նախագահների հետ կքննարկեն եւ կլսեն նրանց կարծիքները արտգործնախարարների փարիզյանհանդիպումից հետո հնչեցված նոր գաղափարների շուրջ: Իսկ թե դրանք ինչ գաղափարներ են` միջնորդները որոշեցին փակագծեր չբացել:
Լուսինե Մուսայելյան
«Ազատություն» ռադիոկայան
