Վիճակագիր-տնտեսագետ Անի Քալաշյանը Aravot.am-ի հետ խոսելով ուղեղների արտահոսքի մասին, փաստում է. «Ուղեղների արտահոսքի պատճառով միջինում մենք ունենում ենք մտավոր մակարդակի անկում, որը, սակայն, կոմպենսացվում է նրանով, որ Հայաստանը «ուղեղների շտեմարան» է: Եթե, օրինակ, Չինաստանում 1 000 000 մարդու պարագայում կհանդիպես մեկ գիտնականի, ապա Հայաստանում` 1000-ից մեկն է գիտնական: Փաստորեն, մեր բնակչության թվաքանակի պակասությունը շուրջ հազար անգամ կոմպենսացվում է մեր որակական հատկանիշներով: Ուղեղների արտահոսքի հաջորդ բացասական կողմը այն է, որ փաստացիորեն պետությունը, տնային տնտեսությունները և անհատները ունենում են ջանքերի և միջոցների կորուստ»:
Ըստ վիճակագրի, ուղեղների արտահոսքը նաեւ դրական կողմեր ունի՝ ինչպես Հայաստանի միջազգային ինտեգրացիան, կապերն ու համագործակցությունը, Հայաստանի միջազգային իմիջը: Նրա խոսքով, «Այդ պարագայում Հայաստանը ներկայանում է որպես խելացի կադրերի երկիր, իսկ գիտնականները աճի հնարավորություն են ունենում, դառնալով մրցունակ միջազգային շուկայում: Եվ եթե անգամ այդ մասնագետների փոքր տոկոսն է վերադառնում, իր ավելի բարձր մակարդակով կոմպենսացնում է արտահոսքի ավելի մեծ քանակը: Ի դեպ, վերադարձածները Հայաստանի համար նոր բնագավառների զարգացման հեռանկար են ապահովում: Մարքեթինգ, աուդիտ….մենեջմենթ…այս տերմիններին մի 20 տարի առաջ ոչ ոք ծանոթ չէր»:
Անի Քալաշյանի հետ հարցազրույցի մանրամասները՝ վաղվա տպագիր «Առավոտում»:
Գոհար ՀԱԿՈԲՅԱՆ
