Այս տարվա 10 ամսվա կտրվածքով Հայաստանի տնտեսական ակտիվության 7,2 տոկոս աճ է արձանագրվել: Այսօր այս մասին կառավարության նիստի ժամանակ ասաց Էկոնոմիկայի նախարար Տիգրան Դավթյանը ՝ ներկայացնելով նախարության համակարգում գտնվող ոլորտների հարկային պարտավորման զարգացումները: Նախարարն առանձնացրեց 4 ոլորտ՝ արդյունաբերության , մեծածախ եւ մանրածախ առեւտրի, զբոսաշրջության եւ տեղեկատվական տեխնոլոգիաների ոլորտները :
Ըստ նախարարի, արդյունաբերության արտադրանքի ծավալները աճել են 10 տոկոսով, 8,5 տոկոս աճ էլ գրանցվել է զբոսաշրջութան ոլորտում, իսկ ծառայությունների ոլորտի աճը կազմել է 11 տոկոս:
Պարոն Դավթյանի տվյալներով, 10 ամսվա կտրվածքով, մշակող արդյունաբերության ոլորտում հարկային մուտքերը 70 միլիարդ դրամ են կազմել, ինչը նախորդդ տարվա նույն ժամանակահատվածի համեմատ 21 տոկոսվ աճել է :
Կարդացեք նաև
Այս ոլորտի սոցվճարների մուտքերի մասով, նախարարը դրական զարգացում է արձանագրել՝ 16,6 միլիարդ դրամ են կազմել հարկային մուտքերը, ինչը նախորդ տարվա նույն ժամանակահատվածի համեմատ մոտ 4 տոկոսով աճել է: Մեծածախ եւ մանրածախ առեւտրի ոլորտում հարկային մուտքերը 122 միլիարդ դրամ են կազմել, նախորդ տարվա համեմատ աճ է գրանցվել 10,9 տոկոսով: Սոցվճարների մուտքերն այս ոլորտում կազմել են 25,5 միլիարդ դրամ նախորդ տարվա 24,1 միլիարդ դրամի փոխարեն:
Տեղեկատվական տեխնոլոգիաների ոլորտում հարկային մուտքերի ծավալը մոտ 5,5 միլիարդ է դրամ է եղել, ինչը նախորդ տարվա համեմատ 31 տոկոսով աճել է: Ոլորտում սոցվճարների գծով հարկային մուտքերը կազմել են 2 միլիարդ դրամ, ինչը նախորդ տարվա նույն ժամանակահատվածի համեմատ սոցվճարների մուտքերն աճել են 20 տոկոսով:
Զբոսաշրջության ոլորտում հարկային մուտքերը կազմել են 1,4 միլիարդ դրամ, նախորդ տարվա 1 միլիարդ դրամի փոխարեն: Սոցվճարների մուտքերն այստեղ կազմել է 440 միլիոն դրամ, նախորդ տարվա 400 միլիոն դրամի փոխարեն:
Արփինե ՍԻՄՈՆՅԱՆ
