«Կոռեկտ չէ օգտագործել մարմնավաճառ տերմինը, պետք է ասել սեքսի աշխատակից»,-ներկայացնելով միջազգային կազմակերպությունների կողմից մշակված նոր տերմիններն, այսօր Ծաղկաձորում ասաց միջազգային մարզիչ Մարինա Մաքսիմովան:
Եռօրյա դասընթացի ընթացքում միջազգային փորձագետը
հայկական լրատվամիջոցներին սովորեցնում էր ինչպես լուսաբանել ՄԻԱՎ/ՁԻԱՀ թեմաները լրագրողական էթիկայի շրջանակներում` որպեսզի չոտնահարվեն այդ վարակով ապրող մարդկանց իրավունքները:
Կարդացեք նաև
Միջազգային կազմակերպությունները գտնում են, որ օրինակ` լրագրողը հրապարակումներում չպետք է օգտագործի թմրամոլ տերմինը եւ փոխարենը պետք է ասի թմրամիջոց օգտագործող:
Ըստ Մարինա Մաքսիմովայի, շատ հաճախ լրագրողներն իրենց նյութերում օգտագործում են այնպիսի արտահայտություն, ինչպես օրինակ` «ՁԻԱՀ-ը 21-րդ դարի ժանտախտ է», մասնագետի ներկայացմամբ, այսպիսի որակումները նպաստում են հասարակության մեջ ՄԻԱՎ-ով ապրող մարդկանց նկատմամբ խարան ձեւավորելուն:
Տիկին Մաքսիմովան նաեւ հստակեցրեց, որ ՁԻԱՀ-ը ՄԻԱՎ-ի վերջնական փուլն է, որից հետո մարդը մահանում է: Սակայն ոչ թե մահանում է ՁԻԱՀ-ից, այլ` դրա պատճառով մարդու մոտ առաջացած հիվանդությունից:
Փորձագետի խոսքերով սխալ է, երբ ասում են «ՁԻԱՀ-ի թեստ հանձնել», պետք է ասել` «ՄԻԱՎ հետազոտություն անցնել»: Կոռեկտ չէ, նաեւ, երբ ՄԻԱՎ ունեցող մարդկանց անվանում են վիրուսակիրներ, ճիշտ է նրանց կոչել ՄԻԱՎ-ով ապրող մարդիկ:
Դասընթացն անցկացվեց դերախաղերով, ֆիլմի ցուցադրությամբ, որտեղ ՄԻԱՎ-ով ապրող մարդիկ, առանց ինքնությունը թաքցնելու եւ տեսախցիկից խուսափելու, պատմում էին իրենց պատմությունները:
Լուսինե ԲՈՒԴԱՂՅԱՆ
