ԱԻՄ նախագահ Պարույր Հայրիկյանը պնդում է, որ ԲՀԿ-ի՝ խորհրդարանական կառավարման համակարգին անցնելու նախաձեռնությունը հակաժողովրդավարական է: «Այդ համակարգի անցնելու մասին խոսողները պետք է գիտակցեն, որ խորհրդարանական համակարգը ժողովրդավարության ամենացածր աստիճանն է, չեմ ուզում ասել ստորագույն աստիճանը: Խորհրդարանական համակարգով ժողովրդին ասում ես մի ընտրի քո ղեկավարին, մենք լավ տղերքով, միջակություններով կհավաքվենք, ում հարմար լինի, կնշանակենք»,- այսօր «Տեսակետ» ակումբում ասաց պարոն Հայրիկյանը:
Ըստ նրա, Հայաստանում գործում է կիսախորհրդարանական, կիսանախագահական համակարգը: Այսինքն՝ ինչպես խորհրդարանական կառավարման համակարգի դեպքում, հիմա էլ, ըստ պարոն Հայրիկյանի, վարչապետին ընտրում է խորհրդարանը. «Ըստ Սահմանադրության՝ ՀՀ նախագահը ԱԺ խմբակցությունների հետ խորհրդակցությունների հիման վրա վարչապետ է նշանակում: Ի վերջո, խորհրդարանն է որոշում՝ ով է լինելու Հայաստանի վարչապետը: Այսօր, փաստորեն, պայքար է տարվում մի բանի համար, որն արդեն կա: Բաց դռներով մտնելու համար կռիվ տալ պետք չէ»:
Պարոն Հայրիկյանը նաեւ հավելեց, որ ԲՀԿ-ից հարցը քննարկելու հրավեր չեն ստացել, մինչդեռ ԱԻՄ-ը, տարիներ առաջ, երբ խորհրդարանում էր, քաղաքական տարբեր հարցեր քննարկելու հրավեր բոլոր ուժերին էր ուղարկում:
Կարդացեք նաև
Արփինե ՍԻՄՈՆՅԱՆ
