«Պետք չէ որեւէ ինտրիգ կամ դավադրության տեսություն որոնել այս խորհրդակցություններում»,- այսօր մամուլի ասուլիսում անդրադառնելով ընթացող քաղաքական խորհրդակցություններին, ասաց «Ժառանգություն» կուսակցության առաջնորդ Րաֆֆի Հովհաննիսյանը: Իր կողմից հավելեց, որ ճիշտ են նման խորհրդակցությունները կուսակցությունների միջեւ, ավելին՝ Հովհաննիսյանի գնահատմամբ՝ դրանք ավելի վաղ պետք է լինեին, մի քիչ ուշացել ենք:
Պատասխանելով լրագրողներից մեկի հարցին՝ անկե՞ղծ է գնահատում արդյոք ԲՀԿ-ի մղումները, Րաֆֆի Հովհաննիսյանն ասաց. «Հույս ունեմ, որ ԲՀԿ-ի կողմից սա հերթական խաղը չէ»:
Անդրադառնալով մեկ այլ հարցի՝ ո՞ր դեպքում Րաֆֆի Հովհաննիսյանը կսատարի ընդդիմության միասնական թեկնածուին եւ չի առաջադրի իր թեկնածությունը, վերջինս պատասխանեց. «Եթե այդ միասնական թեկնածուն միտված է ապագային եւ ոչ թե գործարք է ժողովրդի աչքին թոզ փչելու համար: Միայն այդ դեպքում ես պատրաստ եմ հանել իմ թեկնածությունը»: Այս համատեքստում Րաֆֆի Հովհաննիսյանը չցանկացավ անդրադառնալ հնարավոր թեկնածուների առանձին անունների, միայն հիշեցրեց, որ դեռ հունիսի կեսերին «Առավոտին» տված մի հարցազրույցում ինքը անուններ է հրապարակել, ովքեր, իր համոզմամբ, կարող են հավակնել նոր Հայաստան ձեւավորելուն:
Կարդացեք նաև
Ամեն դեպքում, «Ժառանգության» առաջնորդը հույս ունի, որ փետրվարին Հայաստանում նոր դարաշրջան կսկսվի: Նա վստահ է, որ այդ հնարավորությունը մեր ձեռքում է եւ որեւէ մեկին մեղադրել կամ փնովել պետք չէ:
Նելլի ԳՐԻԳՈՐՅԱՆ
