Այսօր Գյումրու ժուռնալիստների «Ասպարեզ» ակումբում Լևոն Բարսեղյանի նախաձեռնությամբ քննարկվում էին Գյումրու նորընտիր ավագանու առաջին նիստի օրակարգային հարցերը: Ավագանու անդրանիկ նիստը տեղի է ունենալու ուղիղ երկու օրից ` ամիս 22-ին, սակայն մինչ այդ գյումրեցի մտավորականներն ու մասնագետները հավաքվել , իրենց դիտողություններն ու առաջարկություններն էին ներկայացնում` որոշելով, թե ո՞ր հարցերում պետք է փոփոխություններ մտցնել, ո՞ր կետերը հիմնավորել և այլն:
Ինչպես ներկայացրեց նորընտիր ավագանու անդամ Լևոն Բարսեղյանը. «Հայոց պատմության մեջ առաջին անգամն է, որ ավագանու նիստից առաջ քննարկվում է օրակարգը: Նիստից անմիջապես հետո ևս քննարկում ենք անցկացնելու, սա ավանդույթ ենք դարձնելու: Ես 10 օր առաջ քաղաքացիների ընդունելության օր էի հայտարարել `լսելու նրանց առաջարկությունները, խնդիրները, 12 հոգի եկան` ընդհուպ մինչև մարդ ու կնկա վեճերով. կինը ասում էր, ամուսինը Ռուսաստան է գնացել ու հարցնում էր ի՞նչ պիտի լինի, կարո՞ղ է չգա, տունը ձեռքից վերցնեն:Բացատրեցի, որ դա ավագանու լիազորությունների մեջ չի մտնում, բայց, իհարկե, կային հարցեր, որոնք քննարկելը ավագանու լիազորությունների մեջ են մտնում»:
Այս խորհրդակցության ընթացքում հատ-հատ քննարկեցին օրակարգի 12 հարցերը, և երբ հերթը հասավ 9-րդ կետին` «Գյումրի համայնքի սոցիալապես անապահով ընտանքիներին դրամական օգնություն տրամադրելուն », հետաքրքիր մի զրույց ծավալվեց Լևոն Բարսեղյանի ու մասնակիցների միջև: Ցուցակում նշված էր, թե համայնքը Գյումրու որ բնակիչներին է պատրաստվում դրամական օգնություն տրամադրել: Մասնակիցներին անհասկանալի մնաց, թե ինչո՞ւ ցուցակագրված 22 հոգուց միայն մեկին` Ա. Ս.-ին են նախատեսել տրամադրել 100 հազար դրամ, իսկ մյուս 21-ին` 10 հազարական դրամներ: «ժողովուրդ, շատ մի դժգոհեք, դուք վերջին 5 տարին նման բան չեք տեսել, եթե հարցնեիր` ո՞ւմ են տրամադրել գումարները, ասում էին` տես ավագանու հավելվածում, բայց այդ հավելվածը անհետ կորած էր, ոչ մի տեղ չէիր կարող գտնել: Մենք հիմա պետք է ճշտենք, թե ցուցակում տեղ գտած մարդիկ ինչպե՞ս են հանդիպել քաղաքապետին , պետք է տեսնենք քանի՞ հոգի են դիմում ներկայացրել դրամական օգնություն ստանալու, ո՞ւմ են ընտրել, ինչո՞ւ: Նաև կարելի է առաջարկել օգնության ստանդարտ չափորոշիչներ, ասենք` մարդը քիմիաթերապիա է ստանում, դրա համար է օգնություն խնդրում, ուրեմն էսքան գումար է հատկացվում, ուսանողի վարձավճարի դեպքում` էսքան, որպեսզի ավագանու անդամը իր «դաստեն» չհավաքի ու օգնություն ստանալու բերի: Մենք փորձ ունենք այսպիսի դեպքերի, օրինակ` նախկին մարզպետ Լիդա Նանյանը քանդակագործներին տարել, իր տանը աշխատեցրել էր, հետո էլ պետական միջոցներից օգնություն էր գրել: Ալբերտ Վարդանյանին, որը իմ ենթադրությամբ քանդակագործ է, 1միլիոն 200 հազար դրամ օգնություն էր գրել: Այնպես պետք է անել, որ նույն մարդը մի քանի անգամ չստանա օգնություն, ներկայիս մարզպետն էլ` Ա. Գիզիրյանը, օգնությունը միշտ ազատամարտիկներին է տվել, եթե մեկ ուրիշը գնար, կմերժեր»,- ասաց Լևոն Բարսեղյանը:
Նկատի ունենալով, որ օգնությունների հրապարակայնությունն ապահովելու դեպքում կավելանա մարդկանց հոսքը, պարոն Բարսեղյանն առաջարկեց այս նպատակի համար ֆոնդ սահմանել` ասելով, որ այսքան փող ունենք այդ նպատակի համար: Նա նաև առաջարկեց պահպանել էթիկան ու ավագանու նիստերի ժամանակ բարձրաձայն չընթերցել օգնություն ստացողների անուն-ազգանունները` իհարկե դրանք որպես փաստաթուղթ ձեռքի տակ ունենալով:
Կարդացեք նաև
Նունե ԱՐԵՎՇԱՏՅԱՆ
