Այսօր Երեւանի պետական կամերային թատրոնում տեղի ունեցավ Ռումինիայի հայոց միության նախագահ, Ռումինայի գրողների միության նախագահի առաջին տեղակալ, գրող, սենատոր Վարուժան Ոսկանյանի «Շշուկների մատյան» գրքի շնորհանդեսը: Ինչպես ավելի վաղ տեղեկացրել էինք, գիրքը գեղարվեստական ժանրում ներկայացնում է հայ ժողովրդի ցավն ու կորուստները` կապված Ցեղասպանության հետ:
Հայաստանի գրողների միության նախագահ Լեւոն Անանյանը նշեց, որ գիրքն առանձնահատուկ է թեմայով, ասելիքով եւ բովանդակությամբ. «Այն, ինչ պատմվում է գրքում, Հայոց ցեղասպանության ինքնատիպ արտացոլանքն է: Գիրքը բացառիկ գործ է եւ խոսում է այն ճշմարտության մասին, որ ցեղասպանություն է նաեւ մեր տարեգիրների ճակատագիրը: Այն կարծիքը, թե հայ գրողները տասնամյակներ շարունակ չեն կարողացել գրել այս թեմայի շուրջ, ունի արդարացում` ապրած ցավը: Միաժամանակ, վերջին տարիներին մի շարք օտարագիր հեղինակներ անդրադարձան Ցեղասպանությանը եւ հաջողված գեղարվեստական գրքեր գրեցին»: Անանյանը հավելեց, որ «Շշուկների մատյանը» նախկինում թարգմանվել է իտարելեն, իսպաներեն, այս տարի` եբրայերեն, իսկ 2013-ին կթարգմանվի ֆրանսերեն, շվեդերեն, գերմաներեն:
Հայաստանում Ռումինիայի արտակարգ եւ լիազոր դեսպան Կրինա Պրունարիուն ասաց, որ «Շշուկների մատյանն» այնքան հետաքրքիր էր, որ կարդացել է մեկ շնչով. «Գիրքը լի է զգացմունքով եւ օգնում է հիշել պատմությունը: Հատկապես կարեւորում եմ այն փաստը, որ գրքում չկա ատելություն»:
Գրքի հեղինակ Վարուժան Ոսկանյանի խոսքով. «Հայ ժողովրդի հիշողությունն ապրում է ոչ թե անցյալում, այլ ներկայում: Մենք ապրում ենք մեր մեռելների հետ: Մինչ օրս մենք տուփերում պահում ենք նրանց լուսանկարները կամ հագուստները. նրանք, միեւնույնն է, մեզ հետ են, չնայած շատերը գերեզման չունեցան: Նրանք մեռան, որ մենք ապրենք: 1915թ-ին հայ ժողովուդրը կսվեց եւ այդպես մնաց մինչ օրս: Մենք միաժամանակ ապրում ենք երկու աշխարհում: Ցեղասպանությունը պետք է ճանաչվի, որպեսզի այդ աշխարհները միանան»:
Կարդացեք նաև
Անդրադառնալով Ցեղասպանության խնդրին` պարոն Ոսկանյանը փաստեց, որ առկա է երեք դիրքորոշում` մոռանալ կատարվածը, ներել թուրքերին կամ վրեժ լուծել. «Եթե մոռանանք, անձնասպանություն կգործենք: Վրեժ լուծելը շարունակական բնույթ կկրի, բացի այդ` քո ցավը չես կարող մեղմացնել ուրիշի ցավով: Իսկ ներողամիտ լինելու համար պետք է վստահ լինես, որ կատարվածը չի կրկնվի: Այսօր չկա մեկը, որ երաշխավորի դա: Հետեւաբար, մենք ուզում ենք, որ Ցեղասպանությունը ճանաչվի: Տարբեր երկրների խորհրդարաններից հնչեցրած հայտարարությունները բավարար չեն. միջազգային իրավունքը պետք է ճանաչի Ցեղասպանությունը»:
Լուիզա ՍՈՒՔԻԱՍՅԱՆ
