Հայաստանի դեմոկրատական կուսակցության նախագահ Արամ Սարգսյանի գնահատմամբ, 2013-17 թվականների համար կառավարության ներկայացրած հնգամյա ծրագիրը ամբիցիոզ է: «Ծրագրում շատ խնդիրներ կան, ծրագրում խոսք չի գնում, թե վարկային քաղաքականության արդյունքում ինչպիսի արդյունավետությամբ է օգտագործվել, որ վերցրել ենք: Իսկ կառավարությունը վերջին 4,5 տարիներին համարյա կրկնապատկել է պետական պարտքը, եթե վերլուծում ես` ինչի համար է վերցրել վարկերը, համոզված ասում եմ` անգամ մեկ դոլար չի ներդրվել տնտեսության իրական սեկտորը զարգացնելու համար »,- այսօր Հայաստանի դեմոկրատական կուսակցության կազմակերպած 2013-17 թվականների կառավարության ներկայացրած հնգամյա ծրագրի քննարկման ժամանակ ասաց Հայաստանի դեմոկրատական կուսակցության նախագահ Արամ Սարգսյանը:
Ըստ նրա, կառավարությունն իբրեւ կառուցվածքային փոփոխություններ կատարելու համար է վերցրել վարկերը, բայց շարքային քաղաքացին տեղյակ չէ այդ վարկերի օգտագործումն ինչ է տվել երկրին, որովհետեւ, ըստ նրա, կառավարությունը երբեւիցե հաշվետվություն չի տալիս. «Կոնկրետ 500 միլիոն ստացանք, որ իբրեւ թե «Նաիրիտը» վերականգնվի, մինչեւ այսօր «Նաիրիտը» նույն վիճակում է: Նույնը այլ ձեռնարկությունների մասին կարող եմ ասել՝ ձեռքից ձեռք են անցնում, ոչ մի բան չի փոխվում: Այնպիսի տպավորություն ունեմ, որ կառավարությանը 4,5 տարի էր պետք, որ հանկարծ հասկանային, թե արդյունաբերական քաղաքականության մեջ փոփոխություն է պետք մտցնել, մասնավորի հետ համաձայնության հարթակ ստեղծել, բիզնես վիճակն էլ կառավարելու համար երկկողմ պարտավորություններ ունենալ»:
Արփինե ՍԻՄՈՆՅԱՆ
