Սիրիա -- Հալեպի կիսավեր փողոցներից մեկը, 23-ը հոկտեմբերի, 2012թ․
Սիրիայի պետանվտանգության գրասենյակի կողմից ձերբակալված հալեպահայ ռեժիսոր Ավո Գաբրիելյանն ու ազգությամբ ոչ հայ նրա ընկերները դեռեւս հարցաքննվում են: Նրանք անվտանգության ուժերի կողմից ձերբակալված են նոյեմբերի 7-ին: Այս մասին «Ազատություն» ռադիոկայանին փոխանցեց Ազգային առաջնորդարանի Բերիո թեմի բանբեր Ժիրայր Ռեիսյանը: Ըստ նրա, առաջիկա օրերին կավարտվի հետաքննությունը, ինչից հետո արդեն պարզ կդառնա ռեժիսորի հետագա ճակատագիրը:
Ռեիսյանի տվյալներով, Պետանվտանգության ուժերի գրասենյակը հալեպահայ ռեժիսորին ու նրան երկու ընկերներին մեղադրում է ոչ արտոնագրված գործունեության համար: Ռեիսյանը նշում է, որ նրանք օժանդակում էին բարեգործական քրիստոնեական մի կազմակերպության:
«Այս դեպքերի ընթացքում բարեսիրական աշխատանքներ են տանում՝ այլ երկրներից դրամ էին հավաքում մարդկանց օգնելու համար։ Օրենքի խախտում ասելով՝ հավանաբար առանց արտոնության միջոցում են ձեռնարկել, միայն այսքանը», – մեկնաբանում է Ռեիսյանը։
Ինչպես հայկական համայնքը, այնպես էլ քրիստոնեական այդ կազմակերպությունը դիմել են արել Պետանվտանգության գրասենյակին՝ խնդրելով ազատ արձակել երիտասարդներին, սակայն մերժում են ստացել:
Կարդացեք նաև
Ռեիսյանը նաեւ փոխանցեց, որ լուր չունեն հոկտեմբերի 25-ին պատանդառված հայերի ճակատագրից: Բեյրութից Հալեպ ուղեւորվող ավտոբուսի ուղեւորներից 10-ը գերի էին վերցվել։ Նրանցից 7-ը ազգությամբ հայեր են: Մոտ երկու շաբաթ առաջ նրանցից երկուսը` հայր եւ որդի Բաշար եւ Ջորջ Ռաբաթները, ազատ են արձակվել դեռեւս երկու շաբաթ առաջ: Ըստ որոշ ոչ պաշտոնական աղբյուրների` Սիրիական բանակը բանակցություններ է վարում ընդդիմության հետ` պատանդառված քաղաքացիներին հետ վերադարձնելու ուղղությամբ:
Հալեպում, ինչպես նշում է Ռեիսյանը, վերջին օրերին համեմատաբար խաղաղ վիճակ է, թեեւ ամեն օր էլ կան կրակոցներ ու պայթյուններ, իսկ երեկ դիպուկահարի կրակոցից հայաշատ Նոր Գյուղ թաղամասում վիրավորվել է ազգությամբ հայ մի կին, ով հիմա գտնվում է հիվանդանոցում: Նրա կյանքին վտանգ չի սպառնում։
Հալեպում թաղամասեր կան, որ քարուքանդ են. վնասված են նաեւ հայկական համայնքին պատկանող շատ կառույցներ, որոնց վնասի ծավալները դեռեւս ճշտվում են: Լուծման կարիք ունեն տնտեսական հարցերը: Շատ հալեպահայեր չեն աշխատում, ինչի հետեւանքով դժվարություններ ունեն սննդի ձեռքբերման հարցում: Ռեիսյանը նշում է, որ վերջին օրերին առավել լարված է վիճակը Քեսապ քաղաքի շրջակայքում, որտեղ եւս հայեր են բնակվում:
Սիրիայում շուրջ 20 ամիս շարունակվող բախումների հետեւանքով զոհվել է 37 հազարից ավելի մարդ, այդ թվում` չորս տասնյակից ավելի հայեր:
Նաիրա Բուլղադարյան
«Ազատություն» ռադիոկայան
