Օրերս ԿԳ նախարար Արմեն Աշոտյանը հայտարարեց, որ 2013 թ.-ին Հայաստանի ավագ դպրոցները կապահովվեն Wi-Fi ցանցով, իսկ մինչ դպրոցներին հասնելը, նախ բուհերը Wi-Fi կունենան:
Aravot.am-ի հետ զրույցում գրող-հրապարակախոս, «9-րդ հրաշալիք» շաբաթաթերթի գլխավոր խմբագիր Վաչագան Սարգսյանը կարծիք հայտնեց դրա դրական եւ բացասական կողմերի մասին:
Կարդացեք նաև
«Կառավարության ծրագիր կա, որ երկրորդ դասարանից սկսած պետք է տեղեկագիտություն (ինֆորմատիկա) առարկան մտնի դպրոցներ՝ շաբաթը մեկ ժամով, որը ենթադրում է, որ երեխաները պետք է համակարգչի հետ ծանոթանան, կարողանան համակարգչային տարրական հմտություններ ձեռք բերել, որպեսզի հետագայում բավականաչափ լավ իմանան համակարգիչ: Շաբաթական մեկ ժամի դեպքում երեխաները պետք է համակարգչի մոտ լինեն 7-10 րոպե, բարձր դասարաններում՝ ավելի երկար: Եվ եթե համակարգչով գերադասելի ուղղվածություն տրվի աշակերտների հետաքրքրություններին, դա միայն դրական արդյունք կբերի»,- նշեց պարոն Սարգսյանը:
Մեր դիտարմանը՝ եթե դպրոցի ողջ տարածքում Wi-Fi լինի, երեխան գուցե բջջային հեռախոսով դասի ժամին ու հաշվին այլ հետաքրքրություններ որոնի համացանցում, Վաչագան Սարգսյանը պատասխանեց. «Դա անպայման կունենա իր բացասական արդյունքը, երեխաները կսկսեն դա ի չարս գործադրել, որովհետեւ երեխա են: Համապատասխան բանալիներ պիտի լինեն ու փականքներ, որպեսզի դպրոցականները չկարողանան մտնել այն դաշտերը, որոնք իրենց ձեռնտու չեն: Այ դա է խնդիրը, թե չէ՝ համակարգչից երեխային մեկուսացնելն անհնար է, կրթությունը համակարգչով պետք է կազմակերպել, բայց համակարգիչը պետք է լինի օժանդակ միջոց եւ ոչ թե կուռքի պես մի բան: Համակարգիչը պետք է դարձնել գրքի պես մի բան, որի շնորհիվ գիտելիք է ձեռք բերվում, համապատասխան միջավայրում իրականացվում հետազոտություններ, այդ դեպքում համակարգիչն օգտակար է, բայց ես վախենում եմ, որ երեխաները դա ի չարս կօգտագործեն»:
Գոհար ՀԱԿՈԲՅԱՆ
