Լիբանանի ընդդիմությունը կբոյկոտի նոյեմբերի 27-ի խորհրդարանական նիստը, որի ժամանակ ելույթ է ունենալու Հայաստանի նախագահը: Գրում է «Դեյլի սթար» թերթը` հիմնվելով «Մարտ 14» ուժի պատգամավոր Մարվան Համադեհի խոսքերին:
«Մենք չենք մասնակցի խորհրդարանի նախագահ Նաբիհ Բըրրիի հրավիրած նոյեմբերի 27-ի նիստին», – ասել է Համադեհը «Վոյս օֆ Լեբանոն» ռադիոկայանին տված հարցազրույցում:
Համադեհն ասել է, որ բոյկոտն ուղղված չէ Հայաստանի նախագահի դեմ. «Խորհրդարանական նիստը, որին ներկա է լինելու Հայաստանի նախագահը, ուղղված չէ հայ հյուրի դեմ»:
Կարդացեք նաև
Հոկտեմբերի 19-ին Լիբանանի հատուկ ծառայություններից մեկի ղեկավար գեներալ Վիսամ ալ-Հասանի սպանությունից հետո «Մարտ 14» ընդդիմադիր ուժը հայտնել է, որ կբոյկոտի կառավարության և խորհրդարանական ցանկացած միջոցառում, որի մեջ իրենք ներգրավված են և կոչ է արել ձևավորել նոր կառավարություն:
Ընդդիմությունը սպանությունների մեջ մեղադրում էր Սիրիային և պատասխանատվությունը դնում էր վարչապետ Նաջիբ Միկատիի վրա:
Համադեհը վերահաստատել է, որ «Մարտ 14»-ը չի մտնի քաղաքական երկխոսության մեջ՝ մինչև կառավարությունը հրաժարական չտա:
Պատրաստեց Հովհաննես ԻՇԽԱՆՅԱՆԸ
