2012թ. նոյեմբերի 18-ին Երևանի «Աշխատանք» ընկերության մարզադահլիճում տեղի ունեցավ ՀՀ վաստակավոր մարզիչ, Հայաստանում սամբո մարզաձևի հիմնադիրներից` Վիկտոր Ալիխանյանի հուշամրցաշարը՝ մասնակցությամբ ՀՀ Շիրակի, Լոռիի, Տավուշի, Կոտայքի, Արարատի մարզերի, Երևան քաղաքի և ԼՂՀ ավելի քան 250 պատանի մարզիկ-մարզուհիների:
Արդեն 14-րդ անգամ անցկացվող մրցաշարի նպատակն է սամբո մարզաձևի հանրահռչակումը, պատանի մարզիկների ուժերի փորձարկումը, ծանոթությունը՝ պաշտոնական մրցումների ընթացակարգին ու մրցավարների նոր սերնդի փորձի ձեռքբերումը:
Հայաստանի սամբոյի ֆեդերացիայի աջակցությամբ` Սամբոյի և ձյուդոյի օլիմպիական մանկապատանեկան մարզադպրոցի կողմից անցկացվող այս, նաև տարվա ընթացքում արդեն կայացած մի շարք այլ մրցումների /«Նելսոն Ստեփանյանի, Գառնիկ Հովհաննիսյանի միջազգային հուշամրցաշարեր, «Պատանի սամբիստ» միջազգային մրցաշարի հանրապետական փուլ, դպրոցի բաց առաջնություն և այլն/ արդյունքում է պահվում մարզաձևի բարձր հեղինակությունն ու ապահովվում մեր մարզիկների՝ միջազգային մրցասպարեզներում արձանագրվող հաջողությունները:
Հիշեցնենք, որ հայ սամբիստները Մրցաշրջան 2012-ի ընթացքում՝ Եվրոպայի և Աշխարհի առաջնություններում ու Սամբոյի աշխարհի գավաթի փուլերում նվաճել են 2 թիմային գավաթ և 37 մեդալ, որից 16-ը` Սամբոյի և ձյուդոյի օլիմպիական մանկապատանեկան մարզադպրոցի սաներինն է:
Ամենից կարևորն, իհարկե, մարզաձևի անընդհատ աճող մասսայականությունն է: Համեմատության համար նշենք, որ անցած տարվա` Ալիխանյանի մրցաշարին մասնակցել էր 125 մարզիկ, այս տարի՝ 286:
Հայաստանի սամբոյի ֆեդերացիա
