«Հակաիշխանական ալյանսը նախ քաղաքական առումով հնարավոր չէ ԲՀԿ-ի հետ կազմել, որովհետեւ ԲՀԿ-ն երկար ժամանակ եղել է իշխանության մաս եւ չի հայտարարել, որ ինքը ընդդիմություն է»,- այսօր Aravot.am-ի հետ զրույցում այսպիսի տեսակետ հայտնեց «Ազատ դեմոկրատներ» կուսակցության փոխնախագահ Անուշ Սեդրակյանը՝ պատասխանելով մեր հարցին՝ որպես վերլուծաբան:
Հիշեցնենք, որ ՀԱԿ համակարգող Լեւոն Զուրաբյանն իր վերջին ասուլիսում անդրադառնալով ՀԱԿ-ԲՀԿ համագործակցությանը, նշել էր, որ իրենց նպատակն է հասնել Սերժ Սարգսյանի ռեժիմի վերացմանը. «Դա է մեզ միավորում, ես վստահ եմ, որ գնալով հզորանում, ուժեղանում է մեր համախմբումը»:
Եվ մեր հարցին՝ Ձեր կարծիքով, ԲՀԿ-ի օրակարգում կա՞ ՍԵրժ Սարգսյանին հեռացնելու հարցը՝ Անուշ Սեդրակյանը վստահեցրեց. «Հակաիշխանական ալյանսը գաղափարական ծրագիր չէ: Գաղափարական ծրագիրը կամ ընդդիմադիր ծրագիրը չի կարող լինել պայքար՝ 1 մարդու դեմ կամ ռեժիմի դեմ կամ խունտայի դեմ: Մեզ մոտ հաստատապես խունտա չի, մեզ մոտ շատ մեծ թերացումներով գործող պետական ինստիտուտներ են, եւ ընդդիմությունը պետք է բարձրաձայնի այդ թերացումը եւ դրանց փոխելու մեխանիզմը: Բայց մեզ թվում է՝ ընդդիմությունը, որը գալիս է, նա պատրաստվում է վերարտադրվել՝ իբրեւ իշխանություն այլ անձանց կերպով, այլապես ծրագրի հարցն ավելի սուր կդրվեր»:
Մեր հարցին՝ ՀԱԿ-ը դեռ չի՞ հստակեցրել իր համար, որ ԲՀԿ-ի օրակարգում չկա Սերժ Սարգսյանին հեռացնելու հարցը՝ Անուշ Սեդրակյանը պատասխանեց, որ չի կարող այլ քաղաքական ուժի հասկացման սահմանները եւ լիմիտները քննարկել:
Կարդացեք նաև
Նշենք, որ «Ազատ դեմոկրատները» նույնպես ԲՀԿ-ից հանդիպման եւ խորհրդակցության հրավեր էր ստացել եւ ընդունել է առաջարկը. «Պարտավոր ենք հանդիպել բոլորի հետ, որովհետեւ չլսել դիմացինին արդեն ինքնին ոչ մի բան է: Չքննարկելը լուրջ չէ: Թե քննարկման արդյունքն ինչ կլինի՝ դա մի հարց է, բայց քննարկել պետք է»:
Հռիփսիմե ՋԵԲԵՋՅԱՆ
