Արդեն 4-րդ տարին է` Շիրակի մարզի ընդհանուր իրավասության դատարանում լսվում է Լեռնային Ղարաբաղի Մատաղիսի զորամասում 2003 թվականին զինծառայողներ Ռոման Եղիազարյանի և Հովսեփ Մկրտումյանի սպանության փաստի առթիվ հարուցված քրեական գործը: Հիշեցնենք, որ մեղադրվում են նույն զորամասում ծառայած 3 երիտասարդներ`27-ամյա Արայիկ Զալյանը, Մուսա Սերոբյանն ու Ռազմիկ Սարգսյանը:
Այսօր նշանակված էր հերթական դատական նիստը, սակայն Երևանից ժամանող դատախազների բացակայության պատճառով այն դարձյալ հետաձգվեց:
Արդեն 2-րդ անգամն է դատական նիստը հետաձգվում նույն պատճառաբանությամբ: Դատախազներից Արտակ Հարությունյանը հիվանդ է, մյուսն էլ մինչև ամսի 28-ը արձակուրդում է: Վերջիններս հիվանդության կամ արձակուրդում գտնվելու մասին համապատասխան ապացույցներ, փաստաթղթեր չեն ներկայացնում դատարանին, ինչն էլ նիստը վարող դատավոր Հարություն Մովսիսյանի կողմից ընկալվում է որպես անհարգալից վերաբերմունք դատարանի նկատմամբ: Այդուհանդերձ արդեն որերորդ անգամն է դատավորը դատախազների պատճառով ստիպված է լինում հետաձգել նիստը: Այն նշանակվել է ամսի 23-ին, կողմերը պետք է հանդես գան ճառերով:
Նունե ԱՐԵՎՇԱՏՅԱՆ
