Հայ-ուկրաինական տնտեսական համագործակցությունը ամրապնդելու նպատակով այսօր «Անի Պլազա» հյուրանոցում կայացավ հայ-ուկրաինական միջկառավարական համատեղ հանձնաժողովի 6-րդ նիստը:
Հայկական կողմից նիստի համանախագահողը՝ ՀՀ էկոնոմիկայի նախարար Տիգրան Դավթյանը հույս հայտնեց, որ հայ-ուկրաինական տնտեսական համագործակցությունը նոր ուղղություններ ու թափ կստանա հանձնաժողովի նիստից հետո:
Դմիտրի Կոլեսնիկովը՝ Ուկրաինայի պետական կոորպորատիվ իրավունքների եւ գույքի կառավարման պետական գործակալության նախագահը, անցնող տարում հայ-ուկրաինական առեւտրաշրջանառության ծավալի նվազում արձանագրեց: Նա նաեւ հավելեց, որ առեւտրաշրջանառության ծավալի նվազեցումը այնքան կապ չունի հայ-ուկրաինական հարաբերությունների հետ, որքան աշխարհում կատարվող տնտեսական իրադարձությունների հետ:
Նիստի ընթացքում քննարկվեց Հայաստանի եւ Ուկրաինայի միջեւ տնտեսական համագործակցության ներկա վիճակը եւ զարգացման հեռանկարները:
Կարդացեք նաև
Ուկրաինայի կողմից համանախագահող Դմիտրի Կոլեսնիկովը նշեց, որ Հայաստանի եւ Ուկրաինայի միջեւ առեւտրատնտեսական հարաբերությունները հատկապես աշխույժ էին նախքան ԽՍՀՄ-ի փլուզումը: Նա ընդգծեց, որ երկրների տնտեսական համագործակցությունը նոր փուլ է մտել Հայաստանի եւ Ուկրաինայի անկախացումից հետո:
Ներկա կողմերը հատկապես կարեւորեցին արդյունաբերության ու գյուղատնտեսության ոլորտներում համագործակցությունը: «Հնարավորություն պետք է ստեղծվի, որ ուկրաինական որոշ ապրանքատեսակների արտադրության որեւէ ցիկլը կազմակերպվի Հայաստանում՝ լինի դա արտադրական կոպերացիա, թե ավելի սերտ հմագործակցություն ու համագործակցության ավելի բարձր մակարդակ»,- նշեց ՀՀ էկոնոմիկայի նախարար Տիգրան Դավթյանը ու հավելեց, որ Հայաստանում կան համագործակցությանը նպաստող նոր հնարավորություններ՝ մաքսային եւ վիզային ոլորտներում:
Նշենք նաեւ, որ ՀՀ-ի եւ Ուկրաինայի միջեւ 2011-ի դրությամբ առեւտրաշրջանառության ծավալը կազմում է 243,9 միլիոն դոլար:
Աշոտ ԱԹԱՅԱՆ
