«Գիրքը նկարագրում է 20-րդ դարի հայ ժողովրդի եւ հրեաների ճակատագիրը ու մասնավոր նկարագրությունը: Բոլոր այն մարդկանց մասին է, ով տանջվել եւ ենթարկվել է պատմությանը, եւ ոչ նրանց մասին, ովքեր ապրել են այդ պատմությունը»,-Aravot.am-ի հետ զրույցում, «Շշուկների մատյան» գրքի շնորհանդեսի ժամանակ նշեց Ռումինիայի հայոց միության նախագահ, Ռումինայի գրողների միության նախագահի առաջին տեղակալ, գրող, սենատոր Վարուժան Ոսկանյանը:
Նրա պնդմամբ գրքում հայ ժողովրդի էությունն է՝ զետեղված են հայ ժողովրդի ավանդույթները, կրոնը, սովորույթները, խոհանոցը, գույները, հույսերը, տանջանքները: Հերոսների մեծամասնությունը հայեր են, փայլուն դեմքեր՝ Դանիել Վարուժանը, Գրիգոր Զոհրապը եւ այլն.
«Իրական պատմությունը դասագրքերի մեջ գրված չի կարող լինել: Ես պարտվողների մասին եմ գրում, որովհետեւ պարտվողները իրենց հավատքը ունեն: Գիրքս ներողամիտ եւ վրեժխնդրություն պահանջող մարդկանց մասին է: Ես եզրակացության չեմ եկել, քանի որ արվեստը եզրակացություն չի պահանջում, պետք է հարցը բաց պահել, որպեսզի ընթերցողը դատավոր լինի: Գրողը դատախազ կամ դատավոր չէ, նա նկարագրում է փաստերը այնպես ինչպես որ կա»:
Կարդացեք նաև
Գիրքը թշնամությամբ գրված չէ թուրք ժողովրդի հանդեպ: Գրողը թշնամություն կամ ատելություն չի զգում նրանց հանդեպ, չի փորձել ընթերցողին ճնշել.
«Աչքիդ արցունքները չպետք է խոչընդոտ հանդիսանան, որպեսզի թշնամիդ էլ արցունք տեսնի: Գիրքը թարգմանվել է իսպաներեն, եբրայերեն, ֆրանսերեն, հայերեն»:
Մեզ հետ զրույցում գրողը նշեց, որ կարեւոր է միացնել անցյալն ու ապագան՝ անցյալը միայն անցյալին չի պատկանում, այն նաեւ մեր ներկան է: Մեռյալները մեզ հետ են, նրանք մեռյալներ չեն, իրենք դեռ իրենց իրավունքն են պահանջում.
«Չենք կարող մեր ապագան ստեղծել առանց բուժելու անցյալի վերքերը: Ապագան իմաստուն չի լինի, եթե չվերաբերվի մեր անցյալին: Շատ կարեւոր է, որ նոր սերունդը՝ ուսանողները պետք է տեղյակ լինեն մեր պատմությանն ու անցյալին, որպեսզի կառուցեն ներկան եւ ապագան»:
Անժելա ՇԱՀՈՒՄՅԱՆ
