Արվեստագետ Ստեփան Վերանյանը Aravot.am-ի հետ զրույցում նշեց, որ չնայած վերջերս տեղադրված դյուրաբեկ արձանները խայտառակ երեւույթ են, սակայն դրանք վնասելն էլ բանի նման չէ. «Որ այդ արձաններն անճաշակություն են, ոչ մի խոսք ու կասկած լինել չի կարող, ուղղակի ամոթ է, ես չգիտեմ դա ում պրոյեկտն է՝ քաղաքապետարանի՞, մշակույթի նախարարությա՞ն, թե՞ ինքնագլուխ են արել: Գաղափար չունեմ, բայց որ շատ վատ է, միանշանակ է: Վնասելուն էլ դեմ եմ՝ չի կարելի»:
Պարոն Վերանյանը կարծում է, որ անհաջող մեկնարկը տրվել է «Տղամարդիկ» ֆիլմի արձանախմբով ու Նարդի խաղացողի արձանով. «Ես դեմ եմ նման արձաններին: Դրան ավելացրած՝ հիմա էլ մոզաիկաներ են անում շենքերի վրա, որը նույնպես խայտառակություն է, հիշեցնում է 60-ականների Միջին Ասիան, օրինակ՝ տիկնիկային թատրոնի շենքի վրա կա, դրա հետեւի շենքի: Նաեւ մեր շենքն են կաֆելապատել, ասես հանրային զուգարան լինի:
Քաղաքաշինությունը եւ ընդհանրապես քաղաքային կուլտուրան շատ լուրջ բան է՝ պետք է 7 անգամ չափել, նոր մեկ անգամ կտրել: Դեռ հին հույներից եկած բան է՝ արձան դնելը մեծ պատմություն է, որովհետեւ դա մեծ ազդեցություն եւ նշանակություն ունի: Ախր արձանները ճաշակ ձեւավորող օբյեկտներ են»:
Կարդացեք նաև
Գոհար ՀԱԿՈԲՅԱՆ
