«Այսօր աշխարհը դարձել է անկանխատեսելի եւ արագ փոփոխվող, առավել դժվար կառավարելի եւ շատ փոքրացող»,- այսօր նոյեմբերի 19-20-ին Երևանում անցկացվող «21-րդ դարի մարտահրավերները և Հայաստանի անվտանգության հիմնախնդիրները» խորագրով քաղաքագետների և միջազգայնագետների համահայկական գիտաժողովի կազմակերպչական և նախապատրաստական հարցերի շուրջ խոսեց Սփյուռքի նախարար Հրանուշ Հակոբյանը:
Նրա պնդմամբ՝ անկախացած ՀՀ-ն արագ եւ դինամիկ փոփոխությունների հորձանուտում կանգնած է համաշխարհային տարածաշրջանային եւ ներքին բազում մարտահրավերների առջեւ: Համաշխարհային մարտահրավերներ են միջազգային ահաբեկչությունը, զանգվածային զենքի տարածումը, բռնությունը: Հատուկ վտանգ են ներկայացնում թմրանյութերի տարածումն ու տարանցումը, մարդկանց թրաֆիքինգը, փողերի լվացումը.
«Այս ամենին գումարվում են տարածաշրջանային մարտահրավերները: Տարածաշրջանում Ադրբեջանի վարած ռազմատենչ քաղաքականությունը Հայաստանի եւ Արցախի դեմ ուղղված անմիջական ռազմական սպառնալիք է, որը առիթ է փնտրում պատերազմը վերսկսելու համար եւ հոխորտում է էներգետիկ ռեսուրսներ ունենալու պատճառով եվրոպական ընտանիքի անդամ Հունգարիան եւ Ադրբեջանի տխրահռչակ ղեկավարությունը վերջերս մարդկության, նոր սերունդների մեջ նետեց մի նոր կործանարար սերմ՝ արտահանձնելով ու արդարացնելով, ավելին հերոսացնելով, պարգեւներ շնորհելով ՆԱՏՕ-ի նման հզոր ուժային կենտրոնի հովանու ներքո՝ քնած հայ զինվորին կացնահարած վախկոտ ու ողորմելի մարդասպանին»:
Սփյուռքի նախարարի համոզմամբ սա համամարդկային արժեհամակարգին նետված նոր մարտահրավեր է, մարդկության ապագային ուղղված նոր կացնային հարված է.
«Վերջին տարիներին Թուրքիան եւ Ադրբեջանը կազմակերպում են, սերտացնում իրենց կապերը սփյուռքի միջեւ՝ հարվածի հիմնական թիրախ ունենալով սփյուռքահայությանը, փորձելով սեպ խրել Հայաստանի եւ Սփյուռքի միջեւ: Առանձնահատուկ մարտահրավեր է տարածաշրջանում եւ մարդկության դեմ Թուրքիայի կողմից Հայոց Ցեղասպանության ճանաչման եւ դատապարտման մերժումը»:
Համաժողովի նպատակն է նաև քննարկել Հայաստանի և Սփյուռքի առջև ծառացած ներկա հիմնախնդիրները, առաջարկել համատեղ ծրագրեր: Նախատեսվում են մասնագետների խմբերի այցելություններ ՀՀ-ի տարբեր բուհեր և գիտական կենտրոններ` հնարավոր սեմինարներ և հանդիպումներ կազմակերպելու նպատակով:
Հրավիրված էին տարբեր պետությունների գիտահետազոտական և վերլուծական կենտրոններում աշխատող քաղաքագետներ, վերլուծաբաններ և փորձագետներ, որոնք իրենց ներդրումն ունեն ինչպես տվյալ երկրի քաղաքական համակարգի զարգացման, այնպես էլ Հայաստանի Հանրապետության հետ այդ երկրների համագործակցության և բարեկամական կապերի ամրապնդման գործում:
Անժելա ՇԱՀՈՒՄՅԱՆ
