Քաղաքագետ Երվանդ Բոզոյանի կանխատեսմամբ` առաջիկա նախագահական ընտրություններում նախագահի թեկնածուները կլինեն ՀՀԿ-ի, Ժառանգության , եւ ԲՀԿ-ի ղեկավարները: «Կարծում եմ՝ կառաջադրվի Գագիկ Ծառուկյանը, որովհետեւ բոլոր հարցումները ցույց են տալիս, որ ամենաբարձր վարկանիշն ինքը ունի, ու անտրամաբանական է, որ նա չառաջադրվի: Ինչ վերաբերվում է Դաշնակցությանն ու ՀԱԿ-ին, նրանց մեջ կառաջանա միտում կոնսոլիդացվել մի կոնկրետ բեւեռի ու կոնկրետ ծրագրի շուրջ, ու չեմ բացառում, որ լինի Գագիկ Ծառուկյանը»,- այսօր «Հայելի» ակումբում ասուլիսի ժամանակ ասաց քաղաքագետը:
Կառավարման փորձագետ Հարություն Մեսրոբյանն էլ հակադարձեց. «Մեր քաղաքական վերնախավում չկա կոնսոլիդացնող անձ, բոլորը պառակտող են, որովհետեւ իրենց հետ չեն բերում ապագայի տեսլականը, անկախ նրանից, թե որ ազգանունն է, որ կուսակցությունում»: Ըստ նրա` քաղաքական դաշտը կառավարման իմաստով դարձել է անհաջողակների փակ ակումբ. «Ու ինձ հեչ հետաքրքիր չէ, թե որ մի անհաջողակը փետրվարին կդառնա առաջին դեմք, գալու է մարտը, ու մենք էլի խնդիր ենք ունենալու»:
Հարցին, թե խորհրդարանական կառավարման համակարգին անցնելու առաջարկությունը կարո՞ղ է համախմբել քաղաքական ուժերին, պարոն Մեսրոբյանը պատասխանեց, թե չի կարծում, որ ընդդիմությունն է նման բան առաջարկել. «Եթե կա առեւտրի սեղան, ու տարբեր մասնակիցներն իրենց շահերն են առաջ բրդու, եւ ինչ-որ մեկը մյուսի հետ չի համաձայնում, չստացվեց, թե ընդդիմադիր են: Հետո ՝ Հայաստանում ո՞րն է ավելի լավ՝ խորհրդարանականը, թե՞ նախագահական համակարգը, ասեմ՝ Հայաստանում հիմա ամեն ինչ վատն է լինելու, որովհետեւ 91 թվականից մեր կառավարաման բուրգի վերեւում հայտնվեցին ազգի ոչ լավ ներկայացուցիչները, իսկ նրանք վատ կառավարիչներ են: Հետեւապես վատ վարորդին զապառոժեց մեքենայից նստեցնեք Բենթլի, էլի վատ արդյունք է լինելու, կապ չունի ինչ համակարգ է»:
Կարդացեք նաև
Քաղաքագետն էլ հավելեց, որ խորհրդարանական ընտրություններից սպասելիքներ չունեն ու կիսակենցաղային ընտրություններ են ընկալում. «Եթե փոխենք գլխավոր քաղաքական ընտրությունները , մարդկանց վերաբերմունքը կփոխվի»: Բայց պարոն Բոզոյանը չի կարծում, որ խորհրդարանական կառավարման համակարգը երբեւէ կհամախմբի քաղաքական բոլոր ուժերին:
Արփինե ՍԻՄՈՆՅԱՆ
