«Չեմ կարծում, որ ընթացող քաղաքական կոնսուլտացիաները կբերեն այնպիսի իրավիճակի, որ երեք-չորս կուսակցություններ ունենան մեկ թեկնածու: Սա համարյա անհնար եմ համարում: Տրամաբանական չէ ենթադրել, որ ի վերջո՝ ԲՀԿ-ն համակարգը քանդելու ուղղությամբ արմատական քայլերի է գնալու: Թերեւս նման հեռանկարի հավատում է միայն Լեւոն Զուրաբյանը»,- «Առավոտի» հետ զրույցում կարծիք հայտնեց քաղաքագետ Սուրեն Սուրենյանցը՝ անդրադառնալով ԲՀԿ-ի նախաձեռնությամբ ընթացող փակ-գաղտնի քաղաքական կոնսուլտացիաներին: «Գրեթե վստահ եմ, որ Րաֆֆի Հովհաննիսյանը մինչեւ վերջ մասնակցելու է ընտրարշավին՝ եւս մեկ անգամ համոզվելով, որ ինքը 5-6 տոկոսանոց էլեկտորատի կրող է: Գրեթե համոզված եմ, որ ԲՀԿ-ն եւ ՀԱԿ-ը միասնական թեկնածու չեն ունենա: Եթե նույնիսկ ունենան, դա անխուսափելիորեն հանգեցնելու է ՀԱԿ-ի պառակտմանը»,- ավելացրեց նա:
«Առավոտ» օրաթերթ
