Սյունիքի մարզում գյուղմթերքների իրացման խնդիրը գյուղատնտեսության ոլորտի ցավոտ կողմերից մեկն է, համարում Սյունիքի մարզպետարանի գյուղվարչության պետը: Անցած տարի նման խնդիր էր առաջացել կաղամբի իրացման հետ կապված: Սյունիքի մարզպետարանի գյուղատնտեսության եւ բնապահպանության վարչության պետ Սամվել Թանգյանի խոսքով` միայն Սիսիանի տարածաշրջանում 200 տոննա կաղամբի ավելցուկ էր եղել եւ գյուղացիները չեն կարողացել իրացնել եղած կաղամբի քանակը: «Իսկ այս տարի արրդեն կաղամբի պահանջարկ կա, որովհետեւ այս տարի գյուղատնտեսները այնքան կաղամբ չմշակեցին, որքան անցած տարի: Ներկայումս կաղամբի շուկայական գինը հասել է 120 դրամի:
Կարտոֆիլի իրացումը շուկայական կարգով կատարվում է, այստեղ իրացման հետ կապված խնդիր չկա, իսկ սխտորն ամեն մեկն իր ձեւով է վաճառում: Գրեթե խնդիր չունենք նաեւ կաթի իրացման հետ կապված, կան մի քանի ձեռնարկություններ, որոնք կաթը ժամանակին գնում են գյուղացիներից, ճիշտ է, թեւ գնի հետ կապված բնակիչների մոտ դժգհություն է առաջանում որոշ սեզոնների, երբ կաթի գինը 130-140 դրամից իջնում է 110-120 դրամի, բայց համակերպվում են», – նշեց Սամվել Թանգյանը:
Մարզի տարբեր տարաշրջաններում բերքի եւ կաթնամթերքի իրացման խնդիրների մասին միշտ բարձրաձայնում են բնակիչները: Եթե Կապանի տարածաշրջանի գյուղերում կաթի վերամշակման ֆերմաների հարցն են բարձրացնում, ապա Մեղրի տարածաշրջանում` պտղատու այգիներից հավաքած բերքի իրացման դժվարությունների մասին են բարձրաձայնում:
Մերի ՍՈՂՈՄՈՆՅԱՆ
